जाडोमा औंला सुन्निने समस्याबाट बच्ने उपाय

जाडो मौसम लागेसँगै हातखुट्टाका औंला रातो हुने, सुन्निने, चिलाउने, पोल्ने वा घाउ भएर फुट्ने हुनसक्छ । कसैकसैलाई त जाडो मौसममा हातखुट्टाका औंलाहरुमा मात्रै होइन, कानको लोती र नाकको टुप्पोमा समेत यो समस्या देखापर्छ । यस्तोमा नाकको टुप्पो वा कानको लोती चिलाउने, रातो हुने, सुन्निने र घाउसमेत हुनेगर्छ ।
चिसो मौसममा मानिसको शरीरका रक्तनलीहरु साँघुरिन्छ । रक्तसञ्चारमा गडबडी हुँदा वा नसाहरु खुम्चिएर रक्तसञ्चारमा अवरोध हुँदा ससाना नलीहरु खुम्चिछन् । जसले गर्दा औँलाहरु सुन्निने चिलाउने दुख्ने हुनसक्छ । जाडो याममा चिसोबाट बच्न सिधै शरीरलाई तताउँदा पनि मसिना रक्तनलीहरु फुटेर छालामा विभिन्न खालका समस्या आउँछन् ।
यो समस्यालाई समयमै ख्याल गरेर घरमै उपचार गर्न सकिन्छ । यद्यपि यस रोगलाई बेवास्ता गरी समयमै उपचार नगरेको खण्डमा समस्या इन्फेक्सन बढ्दै गएको खण्डमा औंलासमेत झर्न सक्छ ।
चिसोबाट जोगिनु नै यो समस्याबाट बच्ने मुख्य उपाय हो, जुन यसरी गर्न सकिन्छ—
— जाडो याममा हातखुट्टा छोप्ने गरी न्यानो लुगा लगाउने ।
— न्यानो टोपी, मोजा, पञ्जा लगाएर मात्रै घर बाहिर निस्कने ।
— जोडो मौसममा चिसो पानी सकभर नखेलाउने ।
— भाँडा माझ्दा, लुगा धुँदा र घरायसी काम गर्दा सकेसम्म मन तातो पानीको प्रयोग गर्ने ।
— बिहान बेलुका मनतातो पानीमा करिब १५ मिनेट हातखुट्टा डुबाउने ।
— साँझ बिहान आगो वा हिटर बालेर ताप्ने अथवा हात खुट्टाका औंलाहरु घाममा सेकाउने गर्नुपर्छ ।