काठमाडौं । मौसममा देखिएको असरका कारण धनगढी विमानस्थलको हवाइ सेवामा बाधा पुगेको छ । बुधबार प्रतिकुल मौसमका कारण काठमाडौंबाट उडेको श्री एयरलाइन्स र बुद्ध एयरको जहाज अवतरण गर्न नसकेपछि डाइभर्ट भएको छ ।
मौसममा देखिएको समस्याका कारण दुवै विमान सुर्खेत विमानस्थलमा अवतरण गरेका छन् । श्री एयरलाइन्सका धनगढी प्रमुख गजेन्द्रबहादुर शाहीका अनुसार बिहान ९ बजेर ३९ मिनेटमा उडेको जहाजले धनगढीको आकाशमा ४५ मिनेट फन्को हानेको तर मौसम नखुलेपछि सुर्खेत विमानस्थलमा अवतरण गरिएको थियो । मौसममा देखिएको समस्या हटेपछि त्यहाँबाट उडान हुने उनको भनाइ छ ।
बुद्ध एयर धनगढीका प्रमुख बुद्धराम माझीले पनि प्रतिकुल मौसमका कारण विमान अवतरण हुन नसकेपछि फर्किएको जानकारी दिए । बिहान ९ बजेर ४० मिनेटमा काठमाडौंबाट उडेको जहाज कर्णालीको आकाशबाटै फर्किएर सुर्खेत विमानस्थलतर्फ गएको थियो । सुर्खेत विमानस्थलमा अवतरण गरेको विमान मौसम खुलेपछि मात्र धनगढीका लागि उड्ने बुद्ध एयरले जनाएको छ।
