कतिपय मानिसहरूको निन्द्रामा बोल्ने वा बर्बराउने बानी हुन्छ । निन्द्रामा बोलेका कुराहरू उनीहरूलाई नै थाहा हुँदैन ।
निन्द्रामा बरबराउने बानीलाई अङ्ग्रेजीमा ‘सोम्नीलोकी’ भनिन्छ । यसरी बरबराउने मानिसको अवचेतन मनका कुरा थाहा पाइने हुनाले धेरैलाई बरबराहट सुन्न मजा नै आउँछ ।
चिकित्सकका अनुसार निन्द्रामा बर्बराउनुले पर्याप्त निद्रा नपुगेको भन्ने सङ्केत दिन्छ । ज्वरो आएको बेला, धेरै तनावका कारण, दिनभरका थकान, रक्सी मदिराको सेवन लगायतका कारण निद्रामा मानिसहरू बरबराउने चिकित्सकहरू बताउँछन् ।
यस्तै, लामो समयसम्म निद्रा लाग्ने औषधिको सेवन गर्ने व्यक्ति, कुनै ठूलो दुर्घटनामा परेका वा बलात्कारजस्ता घटनाका पीडितमा पनि यस्तो समस्या हुन सक्छ ।
यो समस्याबाट छुटकारा पाउन धेरै कुरा दिमागमा नखेलाउने, चिन्ता नलिने र कामको बोझ सहज पार्नुपर्छ । समयमा सुत्ने र उठ्ने गर्नुपर्छ । यस्तै, शारीरिक स्वास्थ्यमा ध्यान दिनुपर्छ । रक्सी तथा लागूऔषधको प्रयोग गर्नुहुँदैन ।
लामो समयसम्म निद्रा लाग्ने औषधिको सेवन गर्नुहुँदैन । चिकित्सकहरूले कहिलेकाहीँ बर्बराउनुलाई सामान्य रुपमा लिने गरेका छन् । तर, नियमित बर्बराउने, उठेर हिँड्ने तथा झस्किने समस्या भइरहेमा मनोचिकित्सकसँग परामर्श लिनु उपयुक्त हुन्छ ।
