काठमाडौँ । लिबियाकी विदेशमन्त्री नजला मंगोसलाई पदबाट हटाइएको छ ।
नजलाले गत साता रोममा इजरायलका विदेशमन्त्री एली कोहेनसँग गोप्य भेट गरेको भन्दै उनलाई पदबाट बर्खास्त गरिएको अल जजिराले उल्लेख गरेको छ । प्रधानमन्त्री अब्दुलहामिदले नजलालाई पदबाट हटाएको र उनीविरुद्ध छानबिन गर्न आदेश दिएका छन् । मिडिया रिपोर्टका अनुसार नजलाले आइतबार राति नै लिबिया छोडेकी छन् ।
प्यालेष्टाइनलाई समर्थन गर्ने लिबियालीहरूले इजरायललाई शत्रु राष्ट्र मान्ने गर्छन ।
गत हप्ता रोममा विदेशमन्त्रीहरूको सम्मेलनमा लिबियाकी विदेशमन्त्री नजला मङ्गोस र इजरायली विदेशमन्त्री एली कोहेन पनि सहभागी थिए । सो अवसरमा नजला र कोहेनबीच गोप्य भेटवार्ता भएको खबर इटालियन मिडियाले सार्बजनिक गरेका थिए ।
यो खबर बाहिरिएपछि लिबियामा अराजकता सुरु भएको थियो । त्यसपछि लिबियामा सरकारविरुद्ध प्रदर्शन भइरहेको छ । राजधानी त्रिपोलीमा आगजनीका धेरै घटना भएका छन् । यसपछि प्रधानमन्त्री अब्दुलहामिदले विदेशमन्त्रीलाई निलम्बन गर्नुका साथै उनीविरुद्ध छानबिन गर्न आदेश पनि जारी गरेका थिए ।
अर्कोतर्फ इजरायलले जारी गरेको विज्ञप्तिमा दुई विदेशमन्त्रीको भेट इटाली सरकारले आयोजना गरेको र यसबारे दुवै देशका शीर्ष नेतृत्वलाई जानकारी रहेको उल्लेख गरिएको छ । यसका लागि पहिलेदेखि नै तयारी भइरहेको थियो ।
