काठमाडौं । चिनियाँ अर्बपति व्यापारी ज्याक माको नेटवर्थ तीन वर्षअघिको तुलनामा आधाभन्दा कम छ । ब्लुम्बर्ग बिलेनियर्स इन्डेक्सले बुधवार गरेको प्रक्षेपण अनुसार गएको वर्ष माको नेटवर्थ ४ अर्ब १० करोड डलरले घटेको छ । एन्ट ग्रुपको मूल्यांकनमा आएको व्यापक कमीका कारण माको सम्पत्ति घटेको हो ।
एन्टमा माको ९ दशमलव ९ प्रतिशत स्वामित्व छ । उनी कुनै बेला एशियाका सबैभन्दा धनी व्यक्ति थिए । अहिले उनको नेटवर्थ करीब ३० अर्ब डलर छ । यो सन् २०२० को उत्कर्षको भन्दा आधाभन्दा पनि कम हो । त्यति बेला उनको नेटवर्थ ६१ अर्ब २० करोड डलर थियो । अहिले एन्टको बजार पूँजीकरण ७८ अर्ब ५० करोड डलर छ । सन् २०२० को तुलनामा यो ७५ प्रतिशत कम हो ।
त्यति बेला कम्पनीको बजार पूँजीकरण २ खर्ब ३० अर्ब डलर थियो । सीएनएनले गरेको एउटा हिसाब अनुसार एन्ट ग्रुप अनि माले अरुसँग मिलेर खोलेको इ–कमर्श कम्पनी अलिबाबाको संयुक्त बजार पूँजीकरण सन् २०२० को अक्टोबरको अन्त्यतिरको भन्दा झन्डै ८ खर्ब ७७ अर्ब डलर गुमेको छ । त्यही ताका माले चीनको वित्तीय नियामकहरूको उछितो गर्दै एउटा भाषण दिए । माले शाङहाई र हङकङमा एन्टको आईपीओ जारी हुनुभन्दा केही दिनअघि आलोचना गरेका थिए ।
त्यसपछि चीनले निजी कम्पनीहरू विशेषगरी प्रविधि कम्पनीहरूमाथि व्यापक कडाइ शुरु गर्यो । नियामकहरूले आईपीओ जारी गर्नै दिएनन् । व्यवसायको पुनःसंरचना गर्न आदेश दिए । त्यसयता मा निकै लो प्रोफाइल जीवनयापन गरिरहेका छन् । उनी कहिले जापान त कहिले हङकङमा बसिरहेका छन् । उनले आफैले शुरु गरेको कम्पनीबाट माले हात झिकेका छन् । २ वर्षसम्म व्यवसायको पुनःसंरचना गरेपछि जनवरीमा माले एन्टमा रहेको आफ्नो नियन्त्रण पनि त्यागे ।
गएको हप्ता मात्रै चिनियाँ वित्तीय नियामकहरूले उपभोक्ता संरक्षण र कर्पोरेशन सुशासनसँग सम्बन्धी नियम जानीजानी तोडेको भन्दै एन्ट र यसका एकाईहरूलाई झन्डै १ अब डलर जरिवाना तिर्न आदेश दिएका छन् । जरिवानालाई धेरैले नियामक कडाइ अन्ततः सकिने संकेतका रूपमा हेरेका छन् । मा केही दिनअघि मात्रै नेपाल घुमेर गएका थिए । एजेन्सी
