पोखरा । उच्च अदालत पोखराका मुख्य न्यायाधीश डिल्लीराज आचार्यले समाजमा हुने विकृति र विसंगतिका विरुद्ध संचारकर्मीले आवाज उठाइराख्नु पर्ने बताउनुभएको छ ।
पोखरामा सोमबार आयोजित संसदीय पत्रकार मञ्च गण्डकीका नवनिर्वाचित पदाधिकारी तथा सदस्यहरुको सपथ तथा पदस्थापन कार्यक्रममा बोल्दै मुख्य न्यायाधीश आचार्यले पत्रकार आचार संहिता भित्र रहेर संचारकर्मीले गलत प्रवृतिका विरुद्ध समाचार सम्प्रेषण गर्नुपर्नेमा जोड दिनुभयो ।
कुनैपनि समाचार लेख्दा एउटा मात्र समाचार श्रोतलाई आधार नबनाई सम्बन्धित व्यक्तिहरुसँग कोट लिएर समाचार बाहिर ल्याउन सकियो भने पूर्ण र सत्यतथ्यमा आधारित समाचर बन्ने सक्ने भनाई उहाँको छ ।
अदालबाट हुने गतिविधिका समाचार संचार माध्यममा निकै कम आउने गरेको वताउँदै उहाँले अदालतबाट हुने राम्रा नराम्रा दुबै खालका कामहरुको समाचार बाहिर ल्याइदिन समेत उहाँले आग्रह गर्नुभयो ।
जनताको प्रत्यक्ष चासोको विषय रहेको संसदीय गतिविधिका विषयमा संचारकर्मीले रिपोर्टिङ गरी उनीहरुको गसतिविधि जनतामाझ पस्कन समेत उहाँले आग्रह गर्नुभयो । अदालत सधै स्वतन्त्र प्रेसको पक्षमा उभिने प्रतिवद्धता समेत उहाँले व्यक्त गर्नुभयो ।
बरिष्ठ कानून व्यवसायी सुरेन्द्र थापामगरले संचारकर्मीले छिटो समाचार दिने नाउँमा गलत समाचार सम्प्रेषण तथा प्रशारण गर्न नहुने बताउनुभयो । नेपाली पत्रकारिताले निश्पक्ष र विश्वशनीय समाचार दिन सक्नु पर्नेमा उहाँको जोड थियो ।
उच्च अदालत वार एशोसियसन पोखराका अध्यक्ष विष्णु शर्माले पत्रकारिता कठिन र जिम्म्ेवार पेशा हुँदा संचारर्कीले समाचार लेख्दा गम्भीर हुन जरुरी भएको बताउनुभयो । साथै उहाँले पत्रकारिता रामबाण भएकै कारण समाचार सम्प्रेषण गर्दा धेरै श्रोतहरु खोजेर निश्कर्षमा पुग्नुपर्ने सुझाव दिनुभयो ।
संसदीय पत्रकार मञ्च गण्डकी निर्वाचन समिति संयोजक एवं कानून व्यवसायी सरास्वती सुवेदीले निर्वाचित पदाधिकारी तथा सदस्यहरुलाई सपथ तथा पदस्थापन गराउनुभएको थियो । संसदीय पत्रकार मञ्च गण्डकीका अध्यक्ष भरत कोइराला, नागरिक समाजका कास्कीका अध्यक्ष नरेन्द्रमान लालचन, नेपाल पत्रकार महासंघ कास्कीका सचिव माधव बराल लगायतले आफ्ना भनाई राख्नुभएको थियो ।
