काठमाडौँ । नेटोको सदस्यतालाई लिएर रुस र युक्रेनबीच तनाव बढ्दै गएको छ । रुसले १०० भन्दा बढी मिसाइल र ड्रोन हमला गरेपछि युक्रेनले उत्तरी एट्लान्टिक सन्धि संगठनमा सामेल हुन आवेदन दिएको छ ।
यसैबीच रुसले युक्रेनलाई नेटोमा समावेश गरेमा तेस्रो विश्वयुद्ध हुन सक्ने चेतावनी दिएको छ । त्यस्तै, रुसी आक्रमणको शृङ्खला जारी रहेको छ र राजधानी कीभलाई इरानको आत्मघाती ड्रोनले निशाना बनाएको छ । यसअघि रुसका राष्ट्रपति भ्लादिमिर पुटिनले पनि हरेक हतियार प्रयोग गर्ने धम्की दिएर आणविक हमलाको सम्भावना बढाएका थिए ।
रुसको सुरक्षा परिषद्का उपसचिव अलेक्ज्याण्डर भेनेडिक्टोभले भने, ‘युक्रेन पूर्ण रूपमा सचेत छ, यस्तो कदमले तेस्रो विश्वयुद्ध सुरु हुन सक्छ भन्ने ग्यारेन्टी दिन्छ ।’
उनले युक्रेनलाई सहयोग गर्नुले पश्चिमी देशहरू द्वन्द्वको प्रत्यक्ष हिस्सा भएको देखाएको रसियाको विश्वास रहेको पनि उनले बताए । अलेक्ज्याण्डर भेनेडिक्टोभको धम्की यस्तो बेला आएको हो जब संयुक्त राष्ट्र संघको महासभामा रुसले युक्रेनको भूभागलाई गाभेको कुरा ‘गैरकानूनी हो भन्ने प्रस्ताव पारित भएको थियो ।
यसैबीच, नाटो देशहरूले युक्रेनलाई थप सैन्य सहायता र हवाई प्रतिरक्षा प्रणाली उपलब्ध गराउने घोषणा गरेका छन्, ताकि उसले रुसी आक्रमणको सामना गर्न सकोस् । साथै अमेरिकाले युक्रेनलाई आफ्नो प्याट्रियट मिसाइल प्रतिरक्षा प्रणाली दिन सक्ने बताइएको छ, जुन उसले ताइवानलाई पनि दिएको छ । यसैबीच, युक्रेनमा रुसी क्षेप्यास्त्र आक्रमणका कारण देशका राष्ट्रपति भोलोडिमिर जेलेन्स्कीले मस्कोविरुद्ध नयाँ प्रतिबन्ध लगाउन आह्वान गरेका छन् । युक्रेनको घटनाक्रमबारे मंगलबार भएको आपतकालीन बैठकमा जी–७ का नेताहरुलाई सम्बोधन गर्दै उनले यस्तो टिप्पणी गरेका हुन् ।
क्यानडा, फ्रान्स, जर्मनी, इटाली, जापान, बेलायत र अमेरिकाको ब्लकलाई सम्बोधन गर्दै जेलेन्स्कीले भने, ‘आतंकको नयाँ लहरको लागि रुसमाथि जिम्मेवारीको नयाँ लहर हुनुपर्छ । आतंकवादको लहरले जे पनि ल्याउन सक्छ भन्ने सोचबाट पनि आतंकवादी राज्यलाई वञ्चित गर्नुपर्छ । जब रूसले हाम्रा देशहरूको ऊर्जा क्षेत्र र ऊर्जा स्थिरतामा आक्रमण गर्छ, हामीले यसको ऊर्जा क्षेत्रलाई प्रतिबन्धहरू लगाएर अवरोध गर्नुपर्छ, यसको स्थिरता तोड्नु पर्छ ।’
जेलेन्स्कीले रुसी राष्ट्रपति भ्लादिमिर पुटिनसँग वार्ता हुन नसक्ने स्पष्ट तथ्यलाई पनि जोड दिए । उनले भने, ‘वार्ता या त रुसका अर्का प्रमुखसँग हुन सक्छ ताकि आतंकवादीलाई महत्त्वपूर्ण निर्णयहरूमा प्रभाव पार्ने अवसर नहोस् । युक्रेनी नेताको आह्वानमा प्रतिक्रिया दिँदै जी(७ नेताहरूले संयुक्त वक्तव्यमा मिसाइल आक्रमणको कडा निन्दा गरेका छन् ।
