काठमाडौँ । एसीसी प्रिमियर कप अन्तर्गत समुह बि बाट युएई सेमिफाइनलमा पुगेको छ । बुधबार मुलपानी क्रिकेट मैदानमा सम्पन्न खेलमा बहराइनलाई ८ विकेटले पराजित गर्दै युएईले सेमिफाइनलको यात्रा सुनिश्चित गरेको हो ।
बहराइनले दिएको ११७ रनको झिनो लक्ष्य पछाएको युएईले २७.४ ओभरमा २ विकेट गुमाउदै लक्ष्य पुरा गरेको थियो । युएईको जितमा वृत्य अरविन्दले अविजित ६२ र रोहन मुस्ताफाले अविजित ५० रन बनाएका थिए ।
यस अघि टस जितेर पहिला ब्याटिंग गरेको बहराइन ४०.५ ओभरमा अलआउट हुदै ११६ रन मात्र बनाएको थियो । बहराइनका लागि कप्तान हैदर बट र अलि दाउदले सर्बाधिक २३.२३ रन बनाए भने मुहमद योउनिसले १६, इमरान अनवरले १४, वासीक अहमदले १२ र अब्दुल मजिदले ११ रन बनाएका थिए ।
त्यस्तै युएईका बलर अयान अफजल खानले सर्बाधिक ४ विकेट लिए भने रोहन मुस्तफा र कार्थिक मैयप्पनले २(२ विकेट लिएका थिए । त्यस्तै जाहूर खानले एक विकेट लिए ।
यो खेलसँगै समुह बि बाट युएई ४ खेलमा ६ अंकसहित सेमिफाइनलमा पुगेको छ । युएई अहिले समुहमा शिर्ष स्थानमा रहेको भएपनि समुह विजेताको टुंगो भने विहिबार हुने हङकङ र कुवेतबीचको खेलपछि लाग्ने छ । त्यस्तै समुह बि बाट सिंगापुर र बहराइन भने समुह चरणबाट नै बाहिरिएका छन् ।
