कैलाली– नेकपा एमालेका उपाध्यक्ष विष्णु पौडेलले नेता भीम रावलले पार्टी सदस्यका रुपमा गर्नुपर्ने कर्तव्य पालना नगरेको बताएका छन् । रावलले पार्टीलाई कमजोर बनाउने गतिविधि गरेको तथा पार्टी अनुशासन पालना नगरेर गल्ती गरेको पौडेलको भनाइ छ ।
आज बिहान कैलालीको धनगढीमा आयोजित पत्रकार सम्मेलनमा पौडेलले यस्तो बताएका हुन् ।
‘भीम रावलजीले पार्टीको अनुशासनको दृष्टिकोणले, पार्टीको एउटा जिम्मेवार सदस्यले पालना गर्नुपर्ने कर्तव्यको दृष्टिकोणले, उहाँले पार्टी सदस्यको कर्तव्य पालना गर्नु भएको छैन । उहाँले पार्टीको निर्णय पालना गरेर चल्नु भएको छैन । पार्टीको निर्णयको खिलाफ सार्वजनिक रुपमा बोल्नु भएको छ । पार्टीलाई कमजोर पार्ने गतिविधि गरिरहनु भएको छ,’ उपाध्यक्ष पौडेलले भने ।
रावलले कहिले पत्रकार सम्मेलन गरेर र कहिले अधुरा सूचनाका आधारमा क्रियाप्रतिक्रियामा ओर्लिएर गल्ती गर्दै गएको पौडेलको आरोप छ ।
‘घरी उहाँ पत्रकार सम्मेलन गर्नुहुन्छ, घरी क्रियाप्रतिक्रियामा ओर्लिनुहुन्छ । कतिपय अधुरा सूचनाको आधारमा प्रतिक्रियामा उत्रिनुहुन्छ । यहाँले एकपछि अर्को गल्ती गर्दै गर्दै जानुभएको छ,’ उपाध्यक्ष पौडेलले भने ।
