पोखरा, १४ चैत । नेपाल सरकार र राष्ट्र बैककके गलत अर्थनीतिका कारण बैंक तथा वित्तीय संस्थाहरुले अस्वभाविक रुपमा मनोमानी ढंगले व्याजदर वृद्धि गरेको बिरोमा पोखरामा आमासभा गरिने भएको छ । राष्ट्र, राष्ट्रियता, धर्म, संस्कृति र मानव बचाउ महाअभियान नेपालले यही चैत १८ गते पोखराको प्रदर्शनी केन्द्रमा आमसभा गर्न लागेको हो । मंगलबार पोखरामा आयोजित पत्रकार सम्मेलनमा बोल्दै उक्त संस्थाका गण्डकी संयोजक ऋषिराम चापागाईंले बैक तथा वित्तीय संस्थाको चर्को व्याजदरका कारण मारमा परेका उद्यमी, व्यवसायी तथा कृषकका पीडा र गुनासालाई सम्बोधन गर्न यस्तो सभा गर्न लागिएको बताए ।
बैंक तथा वित्तीय संस्थाको आर्थिक अत्याचार र शोषणका विरुद्ध आवाज उठाउँदै व्याजदर घटाउने अभियान अन्तरगतको आन्दोलनबाट राष्ट्रिय अर्थतन्त्रलाई उत्पादनमुखी बनाउने लक्ष्य रहेको जानकारी सो अवसरमा दिइएको थियो । चर्को व्याजदरका कारण राष्ट्रिय अर्थतन्त्रमा परेको प्रभावका विषयमा उद्यमी, व्यवसायी तथा कृषकसँग जानकारी लिन र दिन काम समेत हुने छ, चापागाईंले भने– चर्को व्याजका कारण दु:ख र कष्टपूर्ण जीवनका विताइरहेका युवा उद्यमी तथा व्यवसायी यतिवेला दिउँसै आगो लगाएर मर्न बाध्य छन् ।
लघुवित्तको ऋण तिर्न नसकी नेपाली दिदीवहिनीहरु बिष सेवनगरी मर्न थालेका छन्, संस्थाका अभियन्ता यवराज आचार्यले भने–सुख सयलको जिन्दगी केही अल्पसंख्यक भ्रष्टहरुले गरिरहेका छन् । नेपाली युवाको भविष्य अन्धकार बनाउने काम वर्तमान सरकारले गरिरहेको छ आचार्यले भने । उक्त संस्थाले ‘धर्म संस्कृति एवंम मानव बचाउ अभियान’ को नारालाई लिएर युगान्तकारी सामाजिक तथा आर्थिक रुपान्तरणको भविष्य कोर्न लागेको उनले बताए । पोखरामा गरिने सभालाई अभियन्ता दुर्गा प्रसाई, श्रीराम कँडेल, ऋषिराम चापागाईं, यवराज आचार्यले सम्बोधन गर्ने सो अवसरमा जानकारी दिईएको छ ।
