एजेन्सी । बेलारुसमा आणविक हतियार भण्डारण गर्ने रुसको तयारीप्रति नाटोसहित पश्चिमा देशहरुले आपत्ति जनाएका छन् ।
उनीहरुले रुसी राष्ट्रपति भ्लादिनमिर पुटिन गैरजिम्मेवार बन्दै गएको आरोप समेत लगाएका हुन् । रुसी राष्ट्रपति पुटिनले आगामी जुलाई १ भित्रै छिमेकी बेलारुसमा रणनीतिक महत्वका आणविक हतियार भण्डारण गर्ने तयारी भइरहेको घोषणा गरेपछि पश्चिमा देशहरुले रुसी निर्णयको भत्सना गरेका हुन् ।
नाटोले रुसको निर्णयले आणविक अप्रसार सन्धिको उल्लंघन मात्रै नहुने बरु आणविक हतियारको विस्तार हुने भन्दै रुसको आलोचना गरेको छ । नाटोका प्रवक्ता ओएन्ना लुङ्गेस्कुले रुसको निर्णय खतरनाक र गैरजिम्मेवार भएको बताउनुभयो । तर उहाँले रुस गैरजिम्मेवार बन्यो भन्दैमा नाटो अन्तर्राष्ट्रिय मान्यता र मापदण्डबाट बाहिर नजाने पनि बताउनुभएको छ ।
त्यस्तै रुससँग युद्धरत युक्रेनले रुसी निर्णयमाथि छलफल गर्न र थप कदम चाल्न संयुक्त राष्ट्रसंघीय सुरक्षा परिषदको बैठक माग गरेको छ ।
