पोखरा, २० फागुन । गण्डकी प्रदेश सरकारका मुख्यमन्त्री खगराज अधिकारीले सामुदायिक बिद्यालयहरुको शैक्षिक गुणस्तर बढाउन अभिभावकको भूमिका सबैभन्दा महत्वपूर्ण रहने बताउनुभएको छ । पोखरा–३१ को बेगनासस्थित आनन्द ज्योति माविको ५० औं बार्षिकोत्सब एवं अभिभावक दिवस कार्यक्रम कार्यक्रममा मुख्यमन्त्री अधिकारीले यस्तो कुरा बताउनुभएको हो । पछिल्ला वर्षहरुमा सामुदायिक विद्यालयाको शैक्षिक गुणस्तरमा केही मात्रामा सुधार भएपनि त्यो प्रयाप्त नभएको जानकारी उहाँले दिनुभयो ।
अभिभावकले आफ्ना छोराछोरीलाई निजीमा विद्यालयमा लैजान प्रतिस्पर्धा गर्ने तर सामुदायिक बिद्यालयको शैक्षिक गुणस्तर सुधार गर्न प्रयास नगरेकै कारण सामुदायिक बिद्यालयहरुको गुणस्तर खस्केको उहाँको भनाई थियो । आफैले पढेको बिद्यालयको बार्षिकोत्सव कार्यक्रममा प्रमुख अतिथि बनेर पुग्नुभएका मुख्यमन्त्री अधिकारीले बाल्यकालमा त्यही बिद्यालयमा भौतिक पुर्वधारको अभावका बिच आफूले अध्ययन गरेको स्मरण गर्नुभयो ।
विद्यालय ब्यबस्थापन समितिका अध्यक्ष तीर्थराज अधिकारीको अध्यक्षतामा सम्पन्न कार्यक्रममा अर्थ मन्त्रालयका उपसचिब बसन्तराज तिवारी, शिक्षक अभिभावक संघका अध्यक्ष सन्दीप अधिकारी लगायतले आफ्नो भनाई राखेका थिए । सो अवसर १० लाख रुपैयाँको गुरुप्रसाद अक्षयकोष र १ लाख ११ हजार १ सय ११ रुपैयाँको छबिलाल सरास्वती अक्षयकोष स्थापना भएका छन् ।
इञ्जियर चिरञ्जीबी तिवारी र रमा तिवारीले बुबा गुरुप्रसाद तिवारीको नाममा १० लाख रुपैयाँको अक्षयकोष र डाक्टर श्रीप्रसाद कँडेल, शिवराज कँडेल, शुक्रराज कँडेल र श्रीराम कँडेलले बुबाआमा छबिलाल/सरस्वती कँडेलको नाममा १ लाख ११ हजार १ सय ११ रुपैयाँको अक्षयकोष स्थापना गरेका हुन् । सोही कार्यक्रममा सागर पौडेलले बुबाआमा राकेश/बिजया पौडेलको नाममा ५० हजार रुपैयाँ र शिक्षक अभिभावक संघका अध्यक्ष सन्दीप अधिकारीले हजुरआमा दमयन्ती अधिकारीको नाममा १५ हजार रुपैयाँ विद्यालयलाई हस्तान्तरण गर्नुभएको थियो ।
कार्यक्रममा कक्षा नर्सरी देखि कक्षा १२ सम्मका शैक्षिक तथा अतिरिक्त क्रियाकलापमा उत्कृष्ट विद्यार्थीलाई पुरस्कार बितरण गरिएको थियो भने विभिन्न शीर्षकमा स्थापना भएको अक्षयकोषबाट विद्यार्थीलाई छात्रवृति समेत प्रदान गरिएको विद्यालयले जनाएको छ ।
