काठमाडौँ । युक्रेनी राष्ट्रपति भोलोडिमिर जेलेन्स्कीले संयुक्त बलका कमाण्डर मेजर जनरल एडवार्ड मिखाइलोविच मोस्कालोभलाई बर्खास्त गरेका छन् ।
मोस्कालोभलाई गत वर्ष मार्चमा लेफ्टिनेन्ट जनरल ओलेक्जेन्डर पाभलिकको स्थानमा संयुक्त बलको कमाण्डर नियुक्त गरिएको थियो । लेफ्टिनेन्ट जनरल ओलेक्जेन्डर पाभलिकलाई कीभ क्षेत्रीय सैन्य प्रशासनको प्रमुख बनाइएको थियो ।
यद्यपि, मेजर जनरल एडवार्ड मिखाइलोविच मोस्कालोभलाई बर्खास्त गर्नुको कारण भने खुलाइएको छैन । पछिल्लो समय युक्रेन सरकारले प्रशासनिक स्तरमा धेरै ठूलो परिवर्तन गरेको छ । रुससँग युद्ध जारी रहेका बेला राष्ट्रपति जेलेन्स्कीले भ्रष्ट्राचारमा संलग्न रहेको आरोपमा आफ्नो सरकारका मन्त्री र सेनाका अधिकारीहरुलाई बर्खास्त गरिरहेका छन् । यसकै पछिल्लो सिलसिलाको रुपमा मोस्कालोभलाई हटाएका छन् । तर उनलाई भ्रष्टाचारका कारण वा अन्य कारणले बर्खास्त गरिएको हो भन्ने अझै स्पष्ट भएको छैन ।
युक्रेनी राष्ट्रपति भोलोडिमिर जेलेन्स्कीले रुससँगको युद्धको बीचमा चीनको शान्ति प्रस्तावलाई स्वागत गरेका छन्, तर पुटिनले आफ्नो कब्जामा रहेको युक्रेनी भूभागबाट आफ्ना सबै सेना फिर्ता गरेमा मात्र उनले यो प्रस्ताव स्वीकार गर्ने बताएका छन् । युक्रेनका राष्ट्रपतिले चीनले शान्तिका लागि यो प्रस्ताव गरेको आफूलाई विश्वास रहेको र चीनले रुसलाई हतियार पनि नदिने आशा गरेको बताए ।
