काठमाडौँ। तेस्रो संस्करणको नेपाल प्रिमियर लिग (एनपिएल) क्रिकेट दोस्रो चरणमा प्रवेश गर्ने क्रममा छ । प्रतियोगितामा प्लेअफ पुग्ने चार टोलीको टुङ्गो लागिसकेको छ । यसपालि लुम्बिनी लायन्स, सुदूरपश्चिम रोयल्स, काठमाण्डु गोर्खाज र चितवन राइनोजले प्लेअफमा आफ्नो स्थान सुरक्षित गरेका हुन् ।
प्रतियोगिताको लिग चरणका खेलहरू जारी रहँदा यसपटक केही नेपाली युवा खेलाडीले आफ्नो प्रदर्शनबाट विशेष चर्चा बटुल्नुभएको छ । एनपिएलको प्रत्येक संस्करणले नयाँ प्रतिभालाई राष्ट्रिय तथा अन्तरराष्ट्रिय क्रिकेटमा आफ्नो क्षमता देखाउने अवसर प्रदान गर्दै आएको छ । यसपटक पनि केही युवा खेलाडीले प्राप्त अवसरलाई सदुपयोग गर्दै आफ्नो उपस्थितिलाई बलियो बनाउनुभएको छ । बलिङतर्फ राहुल यादव र रिजन ढकाल तथा ब्याटिङतर्फ लोकेश बम, रशिद खानलगायतले प्रभावशाली प्रदर्शन गर्नुभएको छ ।
ट्यालेन्ट हन्टबाट ‘गोल्डेन क्याप’को दौडमा राहुल
यस संस्करणमा सर्वाधिक चर्चा कमाउन सफल खेलाडीमध्ये एक हुनुहुन्छ युवा तीव्रगतिका बलर राहुल यादव । जनकपुर बोल्ट्समा आबद्ध राहुल ‘ट्यालेन्ट हन्ट’मार्फत छनोट भएर टोलीमा जोडिनुभएको हो । पहिलो सहभागितामै उहाँले आफ्नो बलिङ क्षमताबाट समर्थक तथा क्रिकेटप्रेमीको ध्यान खिच्न सफल हुनुभएको छ ।
राहुलले सात खेलमा १२ विकेट लिनुभएको छ । यससँगै उहाँ प्रतियोगितामा सर्वाधिक विकेट लिने खेलाडीको सूचीमा शीर्षस्थानमा हुनुहुन्छ । काठमाण्डु गोर्खाजविरुद्धको खेलमा राहुलले चार ओभरमा ३१ रन खर्चिएर चार विकेट लिनुभएको थियो । त्यसपछि लगातार दुई खेलमा विकेटविहीन हुनुभएका उहाँले पाँचौँ खेलमा दुई विकेट लिँदै पुनरागमन गर्नुभयो । त्यसपछिका दुई खेलमा क्रमशः एक र तीन विकेट लिनुभएको छ ।
रिजनको निरन्तर विकेट
यस संस्करणमा बलिङतर्फ रिजन ढकाल उत्कृष्ट लयमा देखिनुभएको छ । चितवन राइनोजबाट खेलिरहनुभएका ढकालले हासम्म पाँच खेलमा ११ विकेट लिनुभएको छ । उहाँले प्रतियोगिताका प्रत्येक खेलमा विकेट लिनुभएको छ ।
रिजनको प्रभावशाली बलिङ चितवनका लागि महत्त्वपूर्ण बनेको छ । चितवनले हालसम्म खेलेका छ खेलमध्ये तीन खेलमा जित हासिल गरेको छ । अन्तरराष्ट्रिय क्रिकेटको अनुभवसमेत बटुलिसक्नुभएका ढकालले नेपालका लागि आठ टी–२० अन्तरराष्ट्रिय र चार एकदिवसीय अन्तरराष्ट्रिय खेल खेल्नुभएको छ ।
ब्याटिङमा लोकेश बम अब्बल
ब्याटिङतर्फ लोकेश बमले यस संस्करणको एनपिएलमा राम्रो प्रभाव छोड्नुभएको छ । विराटनगर किङ्सबाट खेलिरहनुभएका उहाँले सात खेलमा २४२ रन बनाउनुभएको छ । उहाँ लिगमा सर्वाधिक रन बनाउने ब्याटर हुनुहुन्छ ।
लोकेशले प्रतियोगितामा दुई अर्धशतकीय पारी खेल्नुभएको छ । नेपालका लागि २९ टी–२० अन्तरराष्ट्रिय खेल खेलिसक्नुभएका लोकेशले अहिलेसम्म एकदिवसीय अन्तरराष्ट्रिय क्रिकेटमा भने डेब्यु गर्ने अवसर पाउनुभएको छैन ।
राशिद खान पनि पुनरामगनको खोजीमा
राशिद खानले पनि एनपिएलको तेस्रो संस्करणमा ब्याटिङबाट चर्चा बटुल्नुभएको छ । काठमाण्डु गोर्खाजबाट खेलिरहनुभएका उहाँले छ खेलमा एक अर्धशतकसहित १५५ रन बनाउनुभएको छ ।
राशिदले नेपालका लागि हालसम्म दुई टी–२० अन्तरराष्ट्रिय खेल खेल्नुभएको छ ।
