काठमाडौं । नेपालका लागि अमेरिकी कार्यवाहक राजदूत मेगन बोल्डिनले आज परराष्ट्रमन्त्री शिशिर खनालसँग भेटवार्ता गरेकी छन्। भेटमा नेपाल–अमेरिका द्विपक्षीय सम्बन्ध, विपद् व्यवस्थापन, पुनर्निर्माण तथा मानवीय सहायता लगायतका विषयमा छलफल भएको छ।
अमेरिकी कार्यवाहक राजदूत बोल्डिनले मन्त्री खनालको हालै सम्पन्न अमेरिका भ्रमणपछि भएको उक्त भेटमा नेपालमा बाढीपहिरोबाट प्रभावित क्षेत्रको उद्धार तथा पुनःस्थापनाका लागि अमेरिकाले उपलब्ध गराइरहेको ३ करोड ६० लाख अमेरिकी डलरभन्दा बढीको सहयोगबारे जानकारी गराइन्। उनले बाढी प्रतिकार्यमा अमेरिका नेपालको प्रमुख सहयोगदाता रहेको उल्लेख गरिन्।
त्यसैगरी, मिलेनियम च्यालेन्ज कर्पोरेसन (एमसीसी) अन्तर्गतको ५५ करोड अमेरिकी डलरको कार्यक्रमले नेपालको विद्युत् प्रसारण सञ्जाल र सडक पूर्वाधार विकासमा योगदान पुर्याउनुका साथै विपद्पछिको पुनःस्थापनालाई समेत तीव्रता दिने बताइन्।
भेटका क्रममा मानव बेचबिखन नियन्त्रणसम्बन्धी अन्तर्राष्ट्रिय मापदण्डअनुरूपको कानुन निर्माणमा अमेरिकाले गरेको सहयोगको चर्चा गर्दै बोल्डिनले उक्त विधेयक शीघ्र पारित गर्न आग्रह गरिन्। साथै, विपद्पछि मानव बेचबिखनको जोखिम न्यूनीकरण गर्न आवश्यक सिफारिसहरूको प्रभावकारी कार्यान्वयनमा पनि उनले जोड दिइन्।
