काठमाडौँ– नेपाली कांग्रेसको १५औँ महाधिवेशनअन्तर्गत उपसभापति र महामन्त्री पदको मतगणना सम्पन्न भएको छ। मतगणनाको अन्तिम परिणामअनुसार उपसभापति खुलातर्फ डा. चन्द्रकान्त भण्डारी र ई. मधु आचार्य विजयी भएका छन्।
भण्डारीले ३ हजार ७३५ मत प्राप्त गर्दै पहिलो स्थान हासिल गर्दा आचार्यले २ हजार ३४२ मत प्राप्त गरेर दोस्रो स्थान लिएका हुन् । यस्तै, अन्य उम्मेदवारमध्ये गोविन्द भट्टराईले १ हजार ७५२, सुरेन्द्रराज पाण्डेले १ हजार ६७३, धनराज गुरुङले १ हजार ५९६, दीपक गिरीले ९२३ र प्रा डा चन्द्रमोहन यादवले ७६० मत प्राप्त गरेका छन् ।
यस्तै, उपसभापति समावेशीतर्फको एक पदमा बिनोदकुमार चौधरी निर्वाचित भएका छन्। चौधरीले १ हजार ७४५ मत प्राप्त गर्दा उनका निकटतम प्रतिस्पर्धी जीवन परियारले १ हजार ६५८ मत प्राप्त गरेका छन् ।
अन्य उम्मेदवारहरु फरमुल्लाह मंसुरले १ हजार १४४, सीता गुरुङले १ हजार ११२ र रञ्जित कर्णले ५६२ मत प्राप्त गरे ।
यता, महामन्त्री खुलातर्फ दुई पदका लागि भएको मतदानमा प्रदीप पौडेल र उदयशमशेर राणा विजयी भएका छन् । महिला महामन्त्रीमा डा. डिला संग्रौला (पन्त) निर्वाचित भएकी छन्।
पौडेलले ४ हजार १९४ मत प्राप्त गर्दै पहिलो स्थान हासिल गर्दा राणाले २ हजार ३३० मत प्राप्त गर्दै दोस्रो स्थानमा रहँदै महामन्त्री पदमा विजयी भएका हुन् ।
महामन्त्री पदका अन्य उम्मेदवारहरुमध्ये डा. सुनिलकुमार शर्माले २ हजार २५७, गुरुराज घिमिरेले १ हजार ५१३, नैनसिंह महरले १ हजार १३४, अमरसिंह पुन मगरले १ हजार १२५, शंकर तिवारीले १२३ र डा. सन्तोष उपाध्यायले ९७ मत प्राप्त गरेका छन् ।
महिला महामन्त्रीमा विजयी संग्रौलाले ३ हजार ११८ मत प्राप्त गरिन् । उनकी निकटतम प्रतिस्पर्धी महालक्ष्मी उपाध्याय (डिना) ले २ हजार ८६४ मत प्राप्त गरेकी छिन् । त्यस्तै, रीता खनालले ८०४ मत प्राप्त गरिन् ।
