काठमाडौं । नेपाल आयल निगमले पेट्रोलियम पदार्थको हाल कायम रहेको मूल्यलाई निरन्तरता दिएको छ । निगम सञ्चालक समितिको आइतबार बसेको बैठकले सोमबार भदौ १ गतेदेखि लागू हुनेगरी पेट्रोल, डिजेल, मट्टीतेल र हवाई इन्धनको साविककै खुद्रा मूल्य कायम गर्ने निर्णय गरेको हो ।
मूल्य यथावत् राखिए पनि निगमलाई पाक्षिक करिब ८१ करोड ३५ लाख रुपैयाँ घाटा हुने निगमले जनाएको छ ।
यसअघि निगमले साउन १८ गतेदेखि लागू हुनेगरी पेट्रोल, डिजेल, मट्टीतेल र हवाई इन्धनको मूल्य वृद्धि गरेको थियो ।
हाल पेट्रोलको मूल्य पहिलो वर्गमा प्रतिलिटर १९७ रुपैयाँ ५० पैसा, दोस्रो वर्गमा १९९ रुपैयाँ र तेस्रो वर्गमा २०० रुपैयाँ कायम छ ।
डिजेल तथा मट्टीतेलको मूल्य पनि पहिलो वर्गमा प्रतिलिटर १९७ रुपैयाँ ५० पैसा, दोस्रो वर्गमा १९९ रुपैयाँ र तेस्रो वर्गमा २०० रुपैयाँ नै रहेको छ ।
निगमले बिक्री क्षेत्रलाई तीन वर्गमा विभाजन गरेको छ। चारआली, विराटनगर, जनकपुर, अमलेखगन्ज, भलबारी, नेपालगञ्ज, धनगढी र वीरगञ्ज पहिलो वर्गमा छन्। सुर्खेत र दाङ दोस्रो वर्गमा तथा काठमाडौं, पोखरा र दीपायल डिपो तेस्रो वर्गमा राखिएका छन् ।
