काठमाडौं फर्किएलगत्तै देउवाको एकताको सन्देश, ‘शक्ति लिन होइन, राष्ट्रिय एकता बलियो बनाउन फर्किएँ’
काठमाडौं । नेपाली कांग्रेसका पूर्वसभापति शेरबहादुर देउवाले पार्टीभित्रको असहमति र निराशा अन्त्य गर्दै एकताबद्ध भएर अघि बढ्न आह्वान गरेका छन्। करिब साढे पाँच महिनापछि काठमाडौं फर्किएका देउवाले आफू शक्ति प्राप्तिका लागि नभई राष्ट्रिय एकता सुदृढ गर्न सक्रिय भएको स्पष्ट पारेका हुन्।
देउवाले कांग्रेस एकताबद्ध भएर अन्य राजनीतिक दलसँग समेत सहमति र सहकार्यका साथ अघि बढ्नुपर्ने आवश्यकता औँल्याएका छन्। पार्टीभित्र देखिएका असहमति र निराशालाई तत्काल समाधान गर्नुपर्ने उनको भनाइ छ।
उनले कांग्रेसजस्तो मुलुकको प्रमुख राजनीतिक शक्तिभित्र विवाद बढ्दा त्यसको असर राष्ट्रियतामै पर्न सक्ने बताएका छन्। त्यसैले नेता, कार्यकर्ता, शुभेच्छुक, समर्थक तथा मतदातासहित आम जनतालाई सामूहिक भावनाका साथ अघि बढ्न उनले आग्रह गरेका छन्।
देउवाले कांग्रेस कसैको व्यक्तिगत इगोका आधारमा नभई जनताको सर्वोपरि हितलाई केन्द्रमा राखेर अघि बढ्नुपर्ने बताएका छन्। पार्टीले त्याग, बलिदान र संघर्षको राजनीतिक संस्कारलाई निरन्तरता दिनुपर्ने उनको जोड छ।
वि.सं. २०३३ मा बीपी कोइराला राष्ट्रिय एकता तथा मेलमिलापको नीति लिएर स्वदेश फर्किएको प्रसंग स्मरण गर्दै देउवाले अहिले पनि मुलुकलाई सर्वपक्षीय राष्ट्रिय एकताको आवश्यकता रहेको बताएका छन्।
आफ्नो काठमाडौं आगमनलाई राजनीतिक शक्ति प्राप्तिसँग नजोड्न आग्रह गर्दै उनले आफू नेता बन्ने उद्देश्यले नभई राष्ट्रको आजीवन नागरिकका रूपमा फर्किएको सन्देश दिएका छन्।
देउवाले राष्ट्र, राष्ट्रियता, लोकतन्त्र र विधिको शासनप्रति आफ्नो अटुट प्रतिबद्धता रहेकोसमेत दोहोर्याएका छन्।
