काठमाडौं । कोशी प्रदेश प्रहरी कार्यालयले विराटनगरका व्यवसायी प्रकाश मुदन्डाको घरमा गरिएको खानतलासी प्रकरणमा मोरङका प्रहरी प्रमुख (एसपी) कवित कटवालसँग स्पष्टीकरण मागेको छ।
प्रदेश प्रहरी कार्यालयले ठूलो संख्यामा प्रहरी परिचालन गरेर गरिएको खानतलासीबारे प्राप्त सूचना, उपलब्ध विवरण र प्रारम्भिक तथ्यका आधारमा उक्त कारबाहीको वैधानिकता, औचित्य, निर्णय प्रक्रिया तथा कार्यसम्पादनबारे गम्भीर कानुनी, सुरक्षा र कार्यविधिगत प्रश्न उठेको जनाएको छ।
कार्यालयका अनुसार प्रहरीको कार्यसम्पादन कानुनी शासन, आवश्यकताको सिद्धान्त, समानुपातिकता, जवाफदेहिता तथा प्रचलित कानुन र प्रहरी नियमावलीअनुसार हुनुपर्ने भए पनि उक्त घटनामा ती मापदण्डको स्पष्ट पालना भएको नदेखिएको प्रारम्भिक निष्कर्ष छ।
यसै आधारमा एसपी कटवाललाई २४ घण्टाभित्र लिखित स्पष्टीकरण पेश गर्न निर्देशन दिइएको छ। तोकिएको समयभित्र चित्तबुझ्दो जवाफ नआए वा स्पष्टीकरण सन्तोषजनक नभए प्रहरी ऐन, प्रहरी नियमावली तथा प्रचलित कानुनअनुसार विभागीय कारबाही प्रक्रिया अघि बढाइने चेतावनी पनि दिइएको छ।
गत सोमबार बिहान प्रहरीले ‘विशेष सूचनाको आधार’ भन्दै व्यवसायी मुदन्डाको घरमा करिब साढे पाँच घण्टा खानतलासी गरेको थियो। तर कुनै आपत्तिजनक सामग्री फेला नपरेपछि प्रहरी टोली फर्किएको थियो।
उक्त घटनापछि प्रहरीको कार्यशैलीको चौतर्फी आलोचना भइरहेको छ भने विषय प्रतिनिधिसभामा समेत उठेको छ।
