काठमाडौं । सुनसरीको देवानगञ्ज गाउँपालिका–३ कप्तानगञ्जमा प्रहरीको गोली लागेर गम्भीर घाइते भएका २२ वर्षीय रवीन्द्र मेहताको उपचारका क्रममा मंगलबार त्रिवि शिक्षण अस्पतालमा मृत्यु भएको छ। तर उनका परिवारले सरकारसँग औपचारिक सम्झौता नभएसम्म शव नबुझ्ने अडान लिएका छन्।
मृतकका परिवार र आफन्तले सरकारले आफ्ना माग सम्बोधन गरी लिखित सहमति नगरेसम्म शव नउठाउने र अन्त्येष्टिमा सहभागी नहुने स्पष्ट पारेका छन्।अस्पताल परिसरमा परिवारका सदस्य र आफन्तहरू आईसीयू बाहिर भेला भएर सरकारमाथि दबाब दिइरहेका छन्। उनीहरूले गृहमन्त्री स्वयं उपस्थित भएर मागका विषयमा छलफल गर्नुपर्ने सर्त राखेका छन्।
परिवारका अनुसार सरकारसँग ठोस सहमति नभएसम्म अस्पतालबाट नफर्किने अडान कायम रहनेछ। यसबीच शिक्षण अस्पताल परिसरमा स्थानीयवासी र आफन्तहरूको उपस्थिति पनि बढ्दै गएको छ।
यसअघि सोही घटनामा ज्यान गुमाएका अन्य तीन जनाका परिवारसँग सरकारले शहीद घोषणा, आर्थिक सहायता तथा परिवारका एक सदस्यलाई रोजगारी उपलब्ध गराउनेलगायत विषयमा सहमति गरेको थियो।
रवीन्द्र मेहताका परिवारले पनि सोही प्रकृतिको सुविधा र प्रतिबद्धता सुनिश्चित नभएसम्म शव नबुझ्ने अडान दोहोर्याएका छन्।
