काठमाडौं। जल तथा मौसम विज्ञान विभागले सुनसरीसहित देशका विभिन्न क्षेत्रमा आज पनि वर्षा जारी रहने र केही स्थानमा भारी वर्षाको सम्भावना रहेको जनाएको छ। विभागले विशेषगरी बाढी, पहिरो र गेग्रान बहावको जोखिम रहेकाले सतर्कता अपनाउन आग्रह गरेको छ।
विभागका अनुसार पछिल्लो २४ घण्टामा सुनसरीमा ९०.६ मिलिमिटर वर्षा र पछिल्लो ६ घण्टामा सिन्धुपाल्चोकमा १५.४ मिलिमिटर वर्षा मापन गरिएको छ।
मौसमविद् डेविट ढकालका अनुसार आज देशका अधिकांश स्थानमा हल्कादेखि मध्यम वर्षा हुनेछ। पहाडी क्षेत्रमा मेघगर्जन र चट्याङसहित वर्षाको सम्भावना रहेको छ भने हिमाली क्षेत्रका केही स्थानमा मध्यम वर्षासँगै हिमपातसमेत हुन सक्ने अनुमान गरिएको छ।
विभागले बागमती, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा भारी वर्षा हुन सक्ने जनाएको छ। साथै, कोशी र सुदूरपश्चिमका तराई क्षेत्र तथा मधेश प्रदेशका केही स्थानमा पनि मेघगर्जन र चट्याङसहित मध्यम वर्षाको सम्भावना रहेको छ।
आज राति पनि पहाडी तथा हिमाली भूभागका केही स्थानमा वर्षा जारी रहने पूर्वानुमान गरिएको छ। विशेषगरी बागमती, गण्डकी र लुम्बिनी प्रदेशका पहाडी क्षेत्रमा राति पनि भारी वर्षा हुन सक्ने मौसमविद्ले बताएका छन्।
विभागले भारी वर्षा हुने सम्भावना रहेका क्षेत्रमा नदी तथा खोलामा पानीको बहाव बढ्न सक्ने, बाढी, पहिरो, भू–क्षय र गेग्रान बहावको जोखिम रहने भएकाले जोखिमयुक्त स्थानमा बसोबास गर्ने तथा यात्रा गर्ने नागरिकलाई उच्च सतर्कता अपनाउन अनुरोध गरेको छ।
