काठमाडौं । भदौ २३ र २४ गते भएका घटनाको निष्पक्ष छानबिन गर्न प्रधानमन्त्री बालेन शाह नेतृत्वको सरकारमाथि परम्परागत राजनीतिक दलहरूले निरन्तर दबाब दिँदै आएका छन् ।
पुराना राजनीतिक दलहरूले घटनाको सत्यतथ्य बाहिर ल्याउन निष्पक्ष र स्वतन्त्र छानबिन आवश्यक रहेको भन्दै सरकारको पटक–पटक ध्यानाकर्षण गराउँदै आएका हुन् ।
तर, जेनजी आन्दोलनमा प्रधानमन्त्री बालेन शाह नेतृत्वको राष्ट्रिय स्वतन्त्र पार्टी (रास्वपा) को समेत संलग्नता र रणनीतिक भूमिका रहेको आरोप लागिरहेका बेला सरकारले घटनाको छानबिनमा अपेक्षित सक्रियता नदेखाएको आलोचकहरूको भनाइ छ ।
आलोचकहरूले वर्तमान सरकारभन्दा विगतका परम्परागत सरकारहरू नै यस्ता घटनाको छानबिन र सुरक्षा संवेदनशीलताका विषयमा बढी गम्भीर देखिएको टिप्पणी गरेका छन् । उनीहरूले भदौ २३ र २४ का घटनाको निष्पक्ष छानबिन नगरेसम्म वास्तविक दोषी पहिचान हुन नसक्ने भन्दै सरकारलाई जिम्मेवार बन्न आग्रह गर्दै आएका छन् ।
