महेन्द्रनगर। नेपाली सेनाको श्रमदानमा कञ्चनपुरको महाकाली नदीस्थित चार लेनको पक्की पुलसँगै निर्माण गरिएको ड्याम (गाइडबण्ड) पुनर्निर्माण सम्पन्न भएको छ ।
श्री नं. २५ बाहिनी अड्डाको संयोजन तथा सुदूरपश्चिम पृतनाको सहयोगमा ४०० भन्दा बढी सेना परिचालन गरी ३५० मिटर लामो ड्यामको मर्मत तथा पुनर्निर्माण गरिएको हो ।
पुलको उत्तरतर्फ रहेको ड्यामको ३५० मिटर भाग पुनर्निर्माण गरी सम्भावित विपद्को क्षति न्यूनीकरणमा सहयोग पुगेको सडक डिभिजन कार्यालय कञ्चनपुरले जनाएको छ । पुनर्निर्माणका लागि आवश्यक निर्माण सामग्री तथा प्राविधिक सहयोग सडक डिभिजन कार्यालयले उपलब्ध गराएको थियो ।
महाकाली नदीमा बाढी आउनसक्ने सम्भावित क्षति न्यूनीकरणका लागि हाल १५० जना सैनिक तयारी अवस्थामा राखिएको सुदूरपश्चिम पृतनाले जनाएको छ ।
सैनिक जनसम्पर्क निर्देशनालयका प्रवक्ता सहायक रथी राजाराम बस्नेतले महाकाली नदीको ड्याम पुनर्निर्माणका लागि सेनालाई दिइएको जिम्मेवारी पूरा भएको जानकारी दिए ।
‘नदीमा जलस्तर बढ्नुअघि नै ड्याम पुनर्निर्माणका लागि दिइएको जिम्मेवारी अहिलेलाई पूरा गरिएको छ,’ उनले भने, ‘बाढीबाट हुनसक्ने सम्भावित क्षति न्यूनीकरणका लागि सेना अझै त्यहाँ तयारी अवस्थामा राखिएको छ ।’
आसन्न मनसुनका क्रममा महाकाली नदीमा बाढी आएर हुनसक्ने सम्भावित विपद् न्यूनीकरण गर्न गत वर्ष पनि उक्त ड्याम निर्माण तथा मर्मतमा नेपाली सेना परिचालन भएको थियो ।
