पर्यावरणविद् तथा सामाजिक कार्यकर्ता सोनम वाङ्चुकलाई दिल्ली प्रहरीले जन्तर–मन्तरबाट उठाएर स्थानीय एक अस्पतालमा भर्ना गरेको छ ।
वाङ्चुक पछिल्लो २० दिनदेखि एनइइटी, सिबिएसई, सियुइटी÷एसएससीजस्ता परीक्षाहरूमा कथित प्रश्नपत्र बाहिरिने समस्यालाई लिएर केन्द्रीय शिक्षामन्त्री धर्मेन्द्र प्रधानको राजीनामाको माग गर्दै भोक हड्तालमा बस्नुभएको थियो । उहाँको स्वास्थ्य बिग्रिँदै गएपछि अदालतको आदेश र चिकित्सकहरूको सल्लाहअनुसार प्रहरीले उहाँलाई अस्पताल पु¥याएको हो ।
सोनम वाङ्चुक अस्पताल भर्ना भएपछि जन्तर–मन्तरमा प्रदर्शन गरिरहेका अन्य प्रदर्शनकारीहरूलाई पनि त्यहाँबाट हटाइएको छ । वाङ्चुक २८ जुनदेखि अनशनमा हुनुहुन्थ्यो ।
उहाँले सङ्घीय शिक्षामन्त्री धर्मेन्द्र प्रधानको राजीनामा माग गरिरहनुभएको थियो र लगातार घट्दो स्वास्थ्य अवस्थाबीच वाङ्चुकले शुक्रबार राति एउटा भिडियो सन्देश जारी गर्नुभएको थियो ।
भिडियोमा उहाँले आफ्नो तौल करिब २० प्रतिशत घटेको र मांसपेशीहरू पनि प्रभावित भएको बताउनुभएको छ । उहाँले भन्नुभएको छ, “म अझै जिउँदै छु। मेरो शरीरको करिब २० प्रतिशत तौल घटेको छ । शरीरको बोसोपछि अब अन्य तन्तु र मांसपेशी पनि घट्दै छन् ।” यसपछि भित्री अङ्गहरू प्रभावित हुने र अन्तमा दिमागमा असर पर्ने तर अहिले त्यो अवस्था नआएको उहाँले बताउनुभयो ।
उनले आफ्नो हिम्मत र मानसिक अवस्था अझै बलियो रहेको बताउनुभयो ।
–‘चलो संसद’ मार्चका लागि आह्वान–
आफ्नो सन्देशमा वाङ्चुकले देशवासीहरूलाई २० जुलाईमा प्रस्तावित ‘चलो संसद’ मार्चमा ठूलो संख्यामा सहभागी हुन अपिल गर्नुभएको छ। उहाँले तर्क गर्नुभयो, “यदि प्याजको मूल्य जस्ता मुद्दामा सरकार जवाफदेही बन्न सक्छ भने, करोडौं विद्यार्थीको भविष्य र शिक्षा प्रणालीमा भएको कथित गडबडीमा पनि जवाफदेही हुनुपर्छ।” उहाँले एनइइटी विवादपछि केही विद्यार्थीले आत्महत्या गरेको दाबी गर्दै यसबारे सरकारबाट जवाफ माग्नुभएको छ।
वाङ्चुकको आन्दोलनलाई धेरै नागरिक संस्था र राजनीतिक व्यक्तित्वहरूले समर्थन गरेका छन्। शिवसेना–यूबीटी प्रमुख उद्धव ठाकरेले पनि एनइइटी परीक्षाको गडबडीविरुद्धको आन्दोलनको समर्थन गर्दै केन्द्र सरकारलाई असंवेदनशील भन्नुभएको छ ।
पर्यावरणविद् तथा सामाजिक कार्यकर्ता वाङ्चुक २८ जुनदेखि अनशन बसिरहनुभएको थियो । चिकित्सकहरूको टोलीले निरन्तर उहाँको स्वास्थ्य निगरानी गरिरहेको थियो। चिकित्सकहरूका अनुसार लामो समय भोजन नलिँदा उहाँको तौल निरन्तर घटिरहेको छ । ककरोच जनता पार्टीले उहाँको तौल अहिलेसम्म करिब ९ किलो घटिसकेको बताएको छ ।
डा. सतीश लाम्बाले बताएअनुसार शुक्रबार उहाँको तौल ५६.५५ किलो रहेकोमा २४ घण्टापछि शनिबार ३५० ग्राम घटेको छ । शरीरमा पानीको मात्रा हल्का कम रहेको छ । पहिले शरीरको बोसो घटेको, त्यसपछि मांसपेशी प्रभावित हुन थाले र अब लामो समय अनशन जारी रहे अरू अङ्गहरूमा पनि असर पर्न सक्ने चिकित्सकहरूले चेतावनी दिएका छन् । चिकित्सकीय टोली २४ घण्टा उहाँको निगरानी गरिरहेको छ ।
