गण्डकी : पोखरा महानगरपालिकाले कफी, सुन्तला र सयपत्री फूलको व्यावसायिक खेती गर्ने किसानलाई कृषि सामग्री, बीउ, बिरुवा र प्रोत्साहन रकम वितरण गरेको छ ।
स्थानीय उत्पादन बढाउने र किसानको आयआर्जनमा वृद्धि गर्ने उद्देश्यले सञ्चालन गरिएको कफी, सुन्तला र सयपत्री फूलखेती प्रवद्र्धन कार्यक्रमअन्तर्गत आज किसानलाई उक्त सहयोग प्रदान गरिएको हो ।
कार्यक्रमको उद्घाटन गर्दै पोखरा महानगरपालिकाका प्रमुख धनराज आचार्यले दोपहरे कृषक समूहलाई सुन्तलाका बिरुवा तथा कफी खेती गर्ने कृषक समूहलाई कफीका बिरुवा रोपेबापतको प्रोत्साहन रकम हस्तान्तरण गर्नुभयो । उहाँले किसानलाई सयपत्री फूलको बीउ र मल्चिङ प्लास्टिक पनि वितरण गर्नुभयो ।
कार्यक्रममा प्रमुख आचार्यले किसानको मेहनत र महानगरको सहयोगका कारण पछिल्ला केही वर्षयता पोखरा सयपत्री फूल उत्पादनमा आत्मनिर्भर बनेको बताउनुभयो । उहाँले महानगरले स्थानीय उत्पादनलाई प्राथमिकता दिँदै आएको उल्लेख गर्दै कृषियोग्य जमिनको संरक्षण गर्न र किसानलाई व्यावसायिक खेतीतर्फ आकर्षित गर्न सबैको सहयोग आवश्यक रहेको उल्लेख गर्नुभयो ।
पोखरामा एक हजार २०० भन्दा बढी कफी हाउस सञ्चालनमा रहेको उल्लेख गर्दै उहाँले पर्याप्त कफी उत्पादन गर्न सके बजारको अभाव नहुने धारणा राख्नुभयो ।
महानगरको कृषि तथा आर्थिक विकास महाशाखाका प्रमुख मनोहर कडरियाका अनुसार कार्यक्रमअन्तर्गत १६५ जना किसानलाई १८१ प्याकेट सयपत्री फूलको बीउ र १५८ थान मल्चिङ प्लास्टिक वितरण गरिएको छ ।
त्यस्तै, ५० जना किसानलाई नौ हजार ७०० कफीका बिरुवा रोप्न रु चार लाख ८५ हजार प्रोत्साहन रकम प्रदान गरिएको छ । साथै, २९ जना किसानलाई एक हजार ४१ वटा सुन्तलाका बिरुवा निःशुल्क र तीन हजार वटा बिरुवा ५० प्रतिशत अनुदानमा वितरण गरिएको छ
