काठमाडौँ । नेपाल राष्ट्र बैंकले बैंक तथा वित्तीय संस्थाका प्रमुख कार्यकारी अधिकृत (सीईओ) को तलब, भत्ता तथा अन्य सुविधासम्बन्धी नयाँ मार्गदर्शन–२०८३ जारी गरेको छ।
राष्ट्र बैंकको बैंक तथा वित्तीय संस्था नियमन विभागले शुक्रबार जारी गरेको उक्त मार्गदर्शन ‘क’ वर्गका वाणिज्य बैंक, ‘ख’ वर्गका विकास बैंक, ‘ग’ वर्गका वित्त कम्पनी तथा ‘घ’ वर्गका लघुवित्त वित्तीय संस्थामा लागू हुने जनाएको छ।
नेपाल राष्ट्र बैंकका कार्यकारी निर्देशक रामु पौडेलका अनुसार सीईओ नियुक्तिका क्रममा नै वार्षिक तलब, भत्ता तथा अन्य सुविधाबारे स्पष्ट रूपमा सम्झौतापत्रमा उल्लेख गर्नुपर्ने व्यवस्था गरिएको छ।
मार्गदर्शनअनुसार वाणिज्य बैंकका सीईओको तलब, भत्ता तथा अन्य सुविधा विगत तीन आर्थिक वर्षको औसत कर्मचारी खर्चको अधिकतम २ प्रतिशतसम्म मात्र हुन सक्नेछ। साथै, यो रकम अघिल्लो आर्थिक वर्षको कुल सम्पत्तिको ०.०१५ प्रतिशतभन्दा बढी हुन पाउने छैन।
त्यसैगरी विकास बैंकका सीईओका लागि विगत तीन आर्थिक वर्षको औसत कर्मचारी खर्चको अधिकतम ३ प्रतिशतसम्मको सीमा तोकिएको छ। उनीहरूको तलब तथा सुविधा अघिल्लो आर्थिक वर्षको कुल सम्पत्तिको ०.०२० प्रतिशतभन्दा बढी हुन नपाउने व्यवस्था गरिएको छ।
राष्ट्र बैंकले सीईओको सेवा–सुविधामा पारदर्शिता, उत्तरदायित्व र संस्थागत सुशासन कायम गर्ने उद्देश्यले नयाँ मार्गदर्शन जारी गरेको जनाएको छ।
