सिंहदरबारभित्र सञ्चालित सेन्ट्रल क्यान्टिनमै गुणस्तरहीन तथा अखाद्य खाद्यवस्तु प्रयोग भइरहेको भेटिएपछि सम्बन्धित सञ्चालकलाई दुई लाख रुपैयाँभन्दा बढी जरिबाना गरिएको छ। वाणिज्य, आपूर्ति तथा उपभोक्ता संरक्षण विभाग र खाद्य प्रविधि तथा गुण नियन्त्रण विभागको संयुक्त अनुगमन टोलीले शुक्रबार गरेको निरीक्षणका क्रममा सिंहदरबारस्थित सेन्ट्रल क्यान्टिन सञ्चालन गर्दै आएको ‘जी एन्ड बी क्याफे ग्रुप’ मा खाद्य सुरक्षासम्बन्धी गम्भीर कमजोरी फेला पारेको हो।
अनुगमनका क्रममा क्यान्टिनको भण्डारण कक्षबाट घुन परेको १७ किलो चनाको दाल, ओसिएको ११ किलो बदाम तथा प्रयोग गर्न नमिल्ने अवस्थामा रहेका १४ वटा फुटेका अण्डा बरामद गरिएको थियो। करिब ६ हजार ५६० रुपैयाँ बराबरका ती सामग्री तत्काल नष्ट गरिएको विभागले जनाएको छ।
निरीक्षण टोलीका अनुसार उपभोक्ताको स्वास्थ्यमा प्रत्यक्ष असर पार्न सक्ने खाद्यवस्तु भण्डारण तथा प्रयोग गरिएको पाइएकाले उपभोक्ता संरक्षणसम्बन्धी कानुनी व्यवस्थाअनुसार क्यान्टिन सञ्चालकलाई २ लाख १ हजार रुपैयाँ जरिबाना गरिएको हो। यसैबीच, भक्तपुरको चाँगुनारायण क्षेत्रमा सञ्चालित जय छुमा गणेश शुद्ध खानेपानी प्रालि मा पनि अनुगमन गरिएको थियो। आवश्यक खरिद बिल तथा कानुनी प्रक्रिया पूरा नगरेको पाइएपछि उक्त उद्योगलाई १० हजार रुपैयाँ जरिबाना गरिएको विभागले जनाएको छ।
शुक्रबारकै अनुगमन अभियानअन्तर्गत काठमाडौंका विभिन्न स्थानमा रहेका अन्य १० व्यवसायिक फर्मको समेत निरीक्षण गरिएको थियो। ती संस्थामा सामान्य प्रकृतिका त्रुटि फेला परेकाले तत्काल सुधार गर्न निर्देशन दिइएको छ। सरकारी निकायहरूले खाद्य सुरक्षा र उपभोक्ता अधिकार सुनिश्चित गर्न बजार अनुगमनलाई निरन्तरता दिने बताएका छन्। सिंहदरबारजस्तो संवेदनशील सरकारी क्षेत्रमा सञ्चालित क्यान्टिनमै अखाद्य सामग्री फेला परेपछि खाद्य गुणस्तर र निगरानी प्रणालीबारे नयाँ प्रश्न उठेको छ।
