स्वदेशी उत्पादनको प्रवर्द्धन र दुग्ध किसानको हित संरक्षणका लागि सरकारले दुग्ध विकास संस्थान (डीडीसी) का उत्पादनको बजार विस्तार तथा प्रवर्द्धनलाई प्राथमिकतामा राख्ने भएको छ।
मंगलबार बसेको मन्त्रिपरिषद् बैठकमा डीडीसीका उत्पादनको देशव्यापी प्रवर्द्धन, बजार विस्तार र संस्थानको सुदृढीकरणबारे विशेष छलफल भएको हो।
कृषि, वन तथा पर्यावरणमन्त्री गीता चौधरीले बैठकमा डीडीसीको उत्पादन प्रवर्द्धनसम्बन्धी विषयलाई प्रमुख एजेन्डाका रूपमा प्रस्तुत गर्दै स्वदेशी दुग्ध उत्पादनको संरक्षण, किसानको हित प्रवर्द्धन तथा संस्थानलाई व्यावसायिक रूपमा सशक्त बनाउन सरकारी तहबाट विशेष पहल आवश्यक रहेको बताइन्।
उनले नेपाली दुग्ध किसानबाट सङ्कलित दूधको उचित व्यवस्थापन, उत्पादनको सुनिश्चित बजार तथा डीडीसीलाई थप प्रतिस्पर्धी, गुणस्तरीय र आत्मनिर्भर संस्थाका रूपमा विकास गर्न विभिन्न सरकारी निकायबीच समन्वय आवश्यक रहेको धारणा राखिन्।
बैठकका क्रममा मन्त्री चौधरीले प्रधानमन्त्री बालेन्द्र शाहसहित मन्त्रिपरिषद्का सदस्यहरूलाई डीडीसीका विभिन्न उत्पादनहरूको प्याकेजसमेत वितरण गरेकी थिइन्।
सरकारले स्वदेशी उत्पादनको उपयोग बढाउने तथा कृषि र दुग्ध क्षेत्रलाई थप सबल बनाउने नीति अन्तर्गत डीडीसीको प्रवर्द्धनलाई प्राथमिकतामा राखेको जनाएको छ।
