काठमाडौं । विपक्षी दल राष्ट्रिय प्रजातन्त्र पार्टी (राप्रपा) ले प्रधानमन्त्री बालेन्द्र साहको नेपाल–भारत सीमा सम्बन्धी अभिव्यक्तिका विषयमा छलफल गर्न सर्वदलीय बैठक बोलाउन सभामुख डोलप्रसाद अर्यालसँग माग गरेको छ।
मंगलबार प्रतिनिधिसभाको बैठकमा राप्रपाकी प्रमुख सचेतक खुश्बु ओली ले राष्ट्रको गरिमासँग जोडिएको विषय भएकाले सबै राजनीतिक दलका शीर्ष नेता तथा सांसदहरूको सहभागितामा सर्वदलीय बैठक आयोजना गर्न सभामुखको ध्यानाकर्षण गराइन्।
उनले प्रधानमन्त्री साहले संसदमा दिएको अभिव्यक्ति सच्याउनुको विकल्प नरहेको बताउँदै त्यसबारे स्पष्ट धारणा सार्वजनिक गर्न आग्रह गरिन्।
प्रमुख सचेतक ओलीले संसदलाई सहमतिविना अघि बढाउने प्रयास नगर्न पनि सभामुखलाई सचेत गराउँदै राष्ट्रिय महत्वका विषयमा दलहरूबीच व्यापक छलफल आवश्यक रहेको धारणा राखिन्।
उनले प्रधानमन्त्रीको अभिव्यक्ति अन्तर्राष्ट्रिय रूपमा समेत चर्चामा आइसकेको उल्लेख गर्दै त्यसले नेपालको राष्ट्रिय छवि र कूटनीतिक अवस्थामाथि असर पार्न सक्ने चिन्ता व्यक्त गरिन्।
ओलीले प्रधानमन्त्रीले आफ्नो भनाइ सच्याएर स्पष्टिकरण दिनुपर्ने माग गर्दै सीमा र राष्ट्रिय स्वाभिमानसँग सम्बन्धित विषयलाई गम्भीरतापूर्वक लिन सबै पक्षलाई आग्रह गरिन्।
