राष्ट्रपति रामचन्द्र पौडेलले राजनीतिक उपलब्धिलाई नागरिकको जीवनस्तरसँग जोड्न शासकीय स्वरूप र राजनीतिक नेतृत्वको चरित्रमा सुधार आवश्यक रहेको बताएका छन् ।
गणतन्त्र दिवसको अवसरमा सैनिक मञ्च टुँडिखेलमा आयोजित विशेष समारोहलाई सम्बोधन गर्दै राष्ट्रपति पौडेलले संघीय लोकतान्त्रिक गणतन्त्रले नेपाली नागरिकलाई सम्पूर्ण राजनीतिक अधिकार सुनिश्चित गर्नुका साथै साझा राष्ट्र निर्माणको संकल्पमा अभिप्रेरित गरेको बताए ।
उनले गणतन्त्रले नागरिकलाई आफ्नो जाति, भाषा, धर्म, संस्कृति र भूमिको स्वामित्व प्रदान गरेको उल्लेख गर्दै यसलाई राष्ट्र निर्माणको महान् प्रेरणाका रूपमा लिनुपर्ने बताए ।
राष्ट्रपति पौडेलले केवल राजनीतिक परिवर्तनले मात्र नागरिकको अपेक्षा पूरा नहुने उल्लेख गर्दै राजनीतिक दल र नेतृत्वलाई सिर्जनशील, विनयशील र जनउत्तरदायी बन्न आग्रह गरे ।
उनले भने, ‘राजनीतिक उपलब्धिहरूले मात्र परिवर्तनलाई नागरिकको जीवनसँग जोड्न पर्याप्त हुँदैन । हामीले हाम्रो शासकीय चरित्र बदल्नुपर्छ । राजनीतिक दल र नेताको चरित्र पनि बदल्नुपर्छ ।’
राष्ट्रपति पौडेलले गणतन्त्रको सार्थकता स्थापित गर्न राजनीति, शासकीय शैली र जनप्रतिनिधिमूलक संस्थालाई पूर्ण लोकतान्त्रिक, निष्पक्ष, प्रतिस्पर्धात्मक, न्यायपूर्ण र प्रभावकारी बनाउन ढिलाइ गर्न नहुने बताए ।
उनले प्राप्त राजनीतिक अधिकारको जगमा सामाजिक न्यायसहित आर्थिक तथा सामाजिक समृद्धि सुनिश्चित गर्नु अहिलेको मुख्य कार्यभार रहेको उल्लेख गरे ।
‘हाम्रा राजनीतिक दल, सरकार र नेतृत्व सृजनशील, विनयशील, जनउत्तरदायी तथा आचरणशील हुनैपर्छ,’ उनले भने, ‘शासकीय संरचना र राज्यका अङ्गलाई गतिशील र परिणाममुखी बनाउनुपर्छ ।’
राष्ट्रपति पौडेलले सुशासनको प्रत्याभूति दिनुपर्नेमा जोड दिँदै ढिलासुस्ती, अनियमितता र बेथितिलाई अहिलेको सबैभन्दा ठूलो चुनौतीका रूपमा औंल्याए ।
उनले लोकतान्त्रिक गणतन्त्रको सपना बोकेका नागरिकलाई बेथितिले निराश बनाउन नहुने उल्लेख गर्दै प्रत्येक नागरिकको जीवनमा आशाको दियो बल्न नसकेसम्म संघीय लोकतान्त्रिक गणतन्त्रको लक्ष्य पूरा नहुने बताए ।
