काठमाडौँ । सरकारले पेट्रोलियम पदार्थ तथा इन्धनको मूल्य तत्काल घटाउने अवस्था नरहेको स्पष्ट पारेको छ ।
उद्योग, वाणिज्य तथा आपूर्ति मन्त्रालयका सचिव कृष्णबहादुर राउतले इण्डियन आयल कर्पोरेशन (आईओसी) ले निर्धारण गर्ने मूल्यका आधारमा नेपाल आयल निगमले इन्धन खरिद गर्नुपर्ने भएकाले मूल्य घटाउन सकिने अवस्था नरहेको बताएका हुन् ।
मंगलबार संघीय संसद् प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा बोल्दै उनले सरकार अहिले उपभोक्ता मारमा नपरून् भन्ने उद्देश्यले पूर्ण स्वचालित मूल्य प्रणाली लागू नगरेको पनि स्पष्ट पारे ।
उनका अनुसार स्वचालित मूल्य प्रणाली लागू गरिएमा पेट्रोलियम पदार्थको मूल्य हालको भन्दा अझ बढी हुन सक्ने अवस्था छ । उनले सरकार घाटामा रहेर पनि इन्धन आपूर्ति गर्दै आएको दाबी गरे ।
सचिव राउतले भने, “महँगोमा किनेर सस्तोमा बेच्दा निगमको सञ्चित नाफा सकिएको छ, त्यसैले मूल्य समायोजन गर्न बाध्य हुनुपरेको हो । पूर्ण स्वचालित प्रणालीमा जाँदा मूल्य अझ बढ्ने देखिन्छ ।”
उनले नेपाल आयल निगम हाल नाफामा नरहेकाले कर्मचारीहरूले बोनस पाउने अवस्था पनि नरहेको जानकारी दिए ।
