काठमाडौँ । युक्रेन युद्धको बीचमा रुसी राष्ट्रपति भ्लादिमिर पुटिनको बारेमा ठूलो दाबी गरिएको छ । रुसी राष्ट्रपति भ्लादिमिर पुटिनको लिमोसिन कारमा बम विष्फोट भएको र उनको हत्या प्रयास भएको दाबि अग्र्दै मिडिया रिपोर्ट सार्बजनिक भएको छ ।
रूसी राष्ट्रपतिको कारको बायाँ भागमा “बलियो विस्फोट” भएको थियो, त्यसपछि “धेरै धुवाँ” उडेको दाबि गरिएको छ । त्यस घटनापछि पुटिनको लिमोसिन कारलाई सकुशल अन्यत्र लगिएको र यस घटनामा पुटिनलाई कुनै क्षति नभएको बताइएको छ ।
यस सम्बन्धमा पुटिनको सुरक्षा सेवाका धेरै व्यक्तिलाई पक्राउ गरिएको समेत दाबि गरिएको छ । यति मात्र होइन, पुटिनको आगमनको सूचना चुहिएपछि उनका धेरै अंगरक्षकलाई हटाइएको समेत मिडिया रिपोर्टमा उल्लेख छ । पुटिन विरोधी जिभिआर टेलिग्राम च्यानलले घटनाको समयमा पुटिन आफ्नो आधिकारिक निवासमा एक सुरक्षा टोलीको साथ फर्कदै गरेको उल्लेख गर्दै ५ वटा सशस्त्र कार मध्ये पुटिन तेस्रो कारमा रहेको बताइएको छ ।
बेलायती अखबार द सनको रिपोर्टका अनुसार पुटिनको हत्याको यो प्रयास कहिले भएको हो भन्ने अझै स्पष्ट भइसकेको छैन । यो दाबीका बारेमा क्रेमलिनले भने अहिलेसम्म कुनै प्रतिक्रिया दिएको छैन । यस टेलिग्राम च्यानलले पुटिन जानुभन्दा केही किलोमिटर अगाडि सुरक्षा टोलीको पहिलो कारलाई एम्बुलेन्सले रोकेको बताइएको छ । यसैबीच पुटिनको कारको बायाँतर्फ ठूलो आवाज सुनियो र त्यसपछि त्यसबाट धुवाँ निस्कन थाल्यो ।
साथै घटनास्थलमा रहेको एम्बुलेन्सका चालक मृत फेला परेकोले यो घटना कुनै आत्मघाती घटना भएको समेत दाबि गरिएको छ । अहिले युक्रेनको जवाफी हमलामा रुसी सेनाले ठूलो क्षति बेहोरेको बेला पुटिनमाथि आक्रमण भएको दाबी गरिएको छ ।
