काठमाडौं – गुणस्तरहीन खाद्यान्नको परीक्षणका लागि ५ वर्ष अघि खरिद गरिएको प्रयोगशालायुक्त मोबाईल भ्यान प्रयोगविहिन भएका छन् । बजारमा पाईने अखाद्य वस्तुको परीक्षण गर्दै उपभोक्ता ठगि नियन्त्रण गर्ने उद्देश्यले ल्याईएको घुम्ति भ्यान पाँच वर्षदेखी अलपत्र परेको हो ।
२०७४ सालमा करिब २४ करोड खर्चेर किनिएको ४ वटा भ्यान अहिले खाद्य प्रविधि तथा गुण नियन्त्रण विभाग परिसरमा थन्किएका छन् । भ्यान खरिद प्रकृयामा अनियमित्ता भएको भन्दै तत्कालिन महानिर्देशक सहित पाँचजना कर्मचारी, बिक्रेता र प्रधानमन्त्री कृषी आधुनिकिकरण परियोजनाका ७ कर्मचारी लगायतलाई भ्रष्टाचार मुद्दा लागेपछि रोकिएको भ्यान सञ्चालनमा अझै कसैको ध्यान गएको छैन ।
विशेष अदालतले भने उनीहरुलाई गत वैशाखमा सफाई दिएर ३ महिनाभित्र सञ्चालन गरेर प्रतिवेदन बुझाउन दिएको निर्देशनको अत्तो पत्तो छैन । खाद्य प्रविधि तथा गुण नियन्त्रण विभाग भने सर्वोच्च अदालतमा मुद्दा विचाराधिन हुँदा प्रमाणको रुपमा २४ करोडको भ्यान जस्ता त्यस्तै राखिएको तर्क गर्छ ।
भ्यानमा खाना पकाउनका लागि अपनाउनुपर्ने सावधानीहरु लेखिएका अक्षर पुरै मेटिएको छ । सवारीका भित्रि पाटपुर्जामा पनि खिया लागेको छ । पाङ्ग्राहरु घाँसले ढाकेका छन् । भ्यानले छ बषेदेखि घाम पनि खाएको छ । अब यसको मर्मत सम्भार र सञ्चालनमा पुन ठूलो धनरासी खर्च हुने पक्का छ । उपभोक्ताकर्मीले भने खाद्य परीक्षणको नाममा राज्यको ढुुकुटी सकाउने काम मात्रै भएको तर्क गरेका छन् ।
४ करोड रुपैया खर्चेर इटालीबाट भ्यान ल्याइएको हो । जडित उपकरणसहित भ्यानको मूल्य करिब ६ करोड रूपैयाँ परेको छ । उपत्यका सहित विराटनगर, धनगढी, भैरहवा पठाएर सञ्चालनमा ल्याउने योजना भएपनि अहिले त्यो पूर्ण रुपमा ठप्प छ । यता बजारमा भने अखाद्य वस्तुको बिक्रि वितरण बढेको बढ्यै छ । उपभोक्तालाई जोडेर करोडौका सामग्री नेपालमा भित्रिएपनि प्रयोग हुन नसक्दा सरकारी बजेटको दुरुपयोग स्पष्ट हुन्छ ।
