काठमाडौँ, ११ माघ : ॐ हस्पिटल एण्ड रिसर्च सेन्टर प्रा. लि. का वरिष्ठ हाडजोर्नी विशेषज्ञ तथा जोर्नी प्रत्यारोपण सर्जन प्रा.डा.नवीस मान सिंह प्रधान पाटन स्वास्थ्य विज्ञान प्रतिष्ठान अन्तर्गत स्कुल अफ मेडिसिनको डिन नियुक्त हुनुभएको छ। खेलकुद चिकित्सा, जोर्नी प्रत्यारोपण तथा काँधसम्बन्धी शल्य चिकित्सामा विशेष दक्षता हासिल गर्नुभएका उहाँको यो नियुक्तिलाई प्रतिष्ठानको शैक्षिक नेतृत्वका दृष्टिले महत्वपूर्ण उपलब्धिका रूपमा हेरिएको छ।
यस अवसरमा ॐ हस्पिटल एण्ड रिसर्च सेन्टर प्रा. लि. परिवारले प्रा. डा. प्रधानलाई हार्दिक बधाई ज्ञापन गर्दै उहाँको कार्यकाल सफल, प्रभावकारी तथा प्रेरणादायी हुने विश्वास व्यक्त गरेको छ। चिकित्सा सेवा, शैक्षिक नेतृत्व तथा हाडजोर्नी र जोर्नी प्रत्यारोपणजस्ता विशेषज्ञ उपचार सेवामा दीर्घ अनुभव हासिल गर्नुभएका प्रा. डा. प्रधानको नेतृत्वले पाटन स्वास्थ्य विज्ञान प्रतिष्ठानको शैक्षिक गुणस्तर अभिवृद्धि तथा संस्थागत विकासमा उल्लेखनीय योगदान पुग्ने अपेक्षा गरिएको छ।
पाटन अस्पतालमा २३ वर्षभन्दा बढी समयदेखि हाडजोर्नी शल्य चिकित्सकका रूपमा सेवा प्रदान गर्दै आउनुभएका प्रा. डा. प्रधानले कुहिनो जोर्नी प्रत्यारोपण, घुँडा जोर्नी प्रत्यारोपण तथा पुठ्टा जोर्नी प्रत्यारोपणजस्ता अत्याधुनिक शल्यक्रियाहरूको सुरुवात गरी अग्रणी भूमिका निर्वाह गर्नुभएको छ। काँध तथा खेलकुद चिकित्सामा फेलोसिप गरेपछि उहाँले काँध आर्थ्रोस्कोपी तथा काँध जोर्नी प्रत्यारोपण शल्यक्रिया सेवाहरू स्थापना गरी उपचार सेवाको दायरा थप विस्तार गर्नुभएको हो।
शैक्षिक क्षेत्रमा समेत सशक्त योगदान दिँदै आउनुभएका प्रा. डा. प्रधान पाटन स्वास्थ्य विज्ञान प्रतिष्ठानको नवप्रवर्तनशील क्षमता–आधारित पाठ्यक्रमको परिकल्पना, संरचना निर्माण तथा कार्यान्वयनमा प्रमुख योगदानकर्ता रहनुभएको छ। स्नातक तथा स्नातकोत्तर दुवै तहका शैक्षिक कार्यक्रमहरूको विकासमा उहाँको भूमिका अत्यन्त महत्वपूर्ण मानिन्छ।
यसअघि उहाँ पाटन स्वास्थ्य विज्ञान प्रतिष्ठान अन्तर्गत हाडजोर्नी तथा आघात शल्य चिकित्सा विभागका अध्यक्ष तथा संस्थागत अनुसन्धान समीक्षा समितिका अध्यक्ष पदमा समेत कार्यरत रहनुभएको थियो। साथै, सन् २०२४ सम्म पाटन स्वास्थ्य विज्ञान प्रतिष्ठानको स्वास्थ्य विज्ञान जर्नलको प्रमुख सम्पादकका रूपमा जिम्मेवारी निर्वाह गर्दै अनुसन्धान तथा शैक्षिक प्रकाशन क्षेत्रमा पनि उल्लेखनीय योगदान पुर्याउनुभएको छ।
हाडजोर्नी तथा जोर्नी प्रत्यारोपण क्षेत्रमा विशिष्ट पहिचान बनाउन सफल प्रा. डा. नवीस मान सिंह प्रधानको शैक्षिक तथा चिकित्सकीय योगदानले पाटन स्वास्थ्य विज्ञान प्रतिष्ठान मात्र नभई समग्र नेपाली स्वास्थ्य क्षेत्रलाई थप सुदृढ बनाउने अपेक्षा गरिएको छ।
