राँझा (बाँके), जिल्लाको कोहलपुर नगरपालिका–१३ खड्कवारस्थित रानीघाट आन्तरिक पर्यटकको रोजाइमा पर्दै गएको छ । बाँके राष्ट्रिय निकुञ्जको मध्यवर्ती क्षेत्रमा अवस्थित रानीघाटमा आन्तरिक पर्यटकको आगमन बढ्दै गएको हो ।
नेपालगञ्ज–२१ पुरैनीबाट घुम्न पुग्नुभएकी अंशु शाहीले रानीघाट नदीमा नुहाउने व्यवस्थाका साथै नजिकैको हात्तीसारले गर्दा यो क्षेत्र आन्तरिक पर्यटकको रोजाइमा पर्ने गरेको बताउनुभयो ।
पाँच हेक्टर क्षेत्रफलमा फैलिएको रानीघाटमा बाँके जिल्लाका साथै बर्दिया, दाङ र सुर्खेतबाटसमेत पर्यटक वनभोजका लागि आउने गरेका रानीघाट पार्क व्यवस्थापन समितिका अध्यक्ष दिनेशकुमार वलीले बताउनुभयो ।
उहाँका अनुसार यो क्षेत्रमा पछिल्लो समय हरेक दिन सयौँको सङ्ख्यामा आन्तरिक पर्यटक आइरहेका छन् । रानीघाटमा आउने पर्यटकका लागि खानेपानी धारा, शौचालय, विद्युत्, फोटो जोन, पिङ, सवारी पार्किङस्थल र मचानको व्यवस्था गरिएको उहाँले जानकारी दिनुभयो ।
नजिकै रहेको रानीघाट नदीमा नुहाउने व्यवस्थाका साथै हात्तीसारबाट निकुञ्जसँगको समन्वयमा हात्तीसफारीसमेत गर्न पाइने भएकाले रानीघाटमा पछिल्लो समय आन्तरिक पर्यटकको चहलपहल बढेको वलीले बताउनुभयो ।
रानीघाट घुम्न आउने आन्तरिक पर्यटकका कारण नजिकैको खड्कवार होमस्टेमा चहलपहल बढेको छ । वनभोज र घुम्न आउने पर्यटक होमस्टेको परिकार चाख्न आउने गरेको खड्कवार होमस्टेका अध्यक्ष लालबहादुर रानाले जानकारी दिनुभयो ।
उहाँका अनुसार बाँके निकुञ्जको गाभर र ढकेरी क्षेत्रपछि अहिले कोहलपुर–१३ को रानीघाट आन्तरिक पर्यटकको रोजाइमा पर्न थालेको छ । घुम्न आएका आन्तरिक पर्यटकलाई स्थानीय अर्गानिक परिकारले स्वागत गर्ने गरिएको छ ।
बाँके निकुञ्जकै मध्यवर्ती क्षेत्रमा पर्ने गाभर भ्याली क्षेत्रमा पनि वनभोज खान र घुम्न जाने आन्तरिक पर्यटकको चहलपहल बढेको छ । वनभोज र घुमघामको यामले बाँके निकुञ्जको मध्यवर्ती क्षेत्रमा रहेका सामुदायिक होमस्टेमा चहलपहल बढेको गाभरभ्याली होमस्टेका अध्यक्ष कृष्ण चौधरीले बताउनुभयो ।
