प्रधानमन्त्री सुशीला कार्कीले आइतबार मन्त्रिपरिषद् विस्तार गर्ने तयारी गरेकी छन् ।
प्रधानमन्त्री कार्यालय स्रोतका अनुसार प्रधानमन्त्री कार्कीले आइतबार मन्त्रिपरिषद् विस्तार गर्दै चार जना मन्त्री नियुक्त गर्ने तयारी गरेकी हुन् । प्रधानमन्त्रीले रक्षा र परराष्ट्र मन्त्रालय आफ्नै जिम्मामा राखेर मन्त्रिपरिषद् विस्तारको गृहकार्य गरेकी हुन् । स्रोतका अनुसार सम्पदाविद् गणपति श्रेष्ठ र बव्लु गुप्तालाई मन्त्रीमा नियुक्त हुँदैछन् । यस्तै सुधा गौतम स्वास्थ्य मन्त्री बन्दै छिन् ।
श्रेष्ठलाई संस्कृति पर्यटन तथा नागरिक उडड्यन, गुप्तालाई युवा तथा खेलकुद मन्त्रायलको जिम्मेवारी दिइने तयारी छ ।
यस्तै दलित अभियन्ता खगेन्द्र सुनारलाई पनि मन्त्री बनाउने चर्चा छ । स्रोतका अनुसार सुनार श्रम, रोजगार तथा सामाजिक सुरक्षा मन्त्री बन्नेछन् ।
२३ र २४ भदौको जेनजी आन्दोलनपछि कार्की २७ भदौमा प्रधानमन्त्री नियुक्त भएकी थिइन् ।
प्रधानमन्त्री कार्कीले पहिलो चरणमा कुलमान घिसिङ, ओमप्रकाश अर्याल र रामेश्वर खनाललाई मन्त्रीमा नियुक्त गरेकी थिइन् ।
त्यसपछि ६ असोजमा उनले दोस्रो पटक ४ मन्त्री थप्दै मन्त्रिपरिषद् विस्तार गरेकी थिइन् ।
पूर्वन्यायाधीश अनिलकुमार सिन्हा, तात्कालीन राज्य पुनर्संरचना आयोगका संयोजक मदन परियार, राष्ट्रिय आविष्कार केन्द्रका अध्यक्ष महावीर पुन र पत्रकार जगदीश खरेललाई मन्त्री नियुक्त गरेकी थिइन् ।
प्रधानमन्त्री कार्कीले परराष्ट्र, रक्षा, खानेपानी , महिला, बालबालिका तथा ज्येष्ठ नागरिक, युवा तथा खेलकुद, वन तथा वातावरण, श्रम, रोजगार तथा सामाजिक सुरक्षा, संस्कृति, पर्यटन तथा नागरिक उड्डयन र स्वास्थ्य तथा जनसंख्या मन्त्रालय आफैं सम्हाली रहेकी छन् ।
