काठमाडौं । नेकपा एमालेले आगामी मङ्सिर २७ देखि २९ गतेसम्म पोखरामा हुने ११औँ महाधिवेशनका तयारीलाई तीव्र गति दिएको छ। पार्टीले केही दिनमै केन्द्रीय सचिवालय बैठक बोलाएर प्रतिनिधि छनोटको विधि, मापदण्ड र प्रक्रिया टुंग्याउने तयारी गरेको छ।
गत असोज ३१ गते सम्पन्न केन्द्रीय कमिटी बैठकले महाधिवेशनको मिति तोके पनि कार्यतालिका र छनोट प्रक्रिया भने स्थिर गरिएको थिएन। अब सचिवालय बैठकअघि संगठन विभागले प्रतिनिधि छनोटका लागि प्रारम्भिक खाका तयार गर्ने र त्यसलाई अन्तिम स्वीकृतिपछि सर्कुलरका रूपमा देशभर पठाइने पार्टी स्रोतले जनाएको छ।
एमालेले ठूला राजनीतिक परिस्थिति नबदलिएको खण्डमा तोकिएकै मितिमा महाधिवेशन सम्पन्न गर्ने अडान लिएको छ। पार्टीले महाधिवेशन सुरु हुनुभन्दा १५ दिनअघि देशभर एकैदिन प्रतिनिधि छनोट गर्ने तयारी गरेको छ।
छनोट प्रक्रिया प्रदेश, निर्वाचन क्षेत्र, जनसंगठन र विभागीय संरचनाका आधारमा हुनेछ। यस क्रममा महिला, दलित, जनजाति र पिछडिएका समुदायको प्रतिनिधित्व सुनिश्चित गरिने एमालेले जनाएको छ।
जिल्ला कमिटीले छनोट गरेका प्रतिनिधिहरूको विवरण र तस्बिर केन्द्रीय कार्यालयमा पठाइनेछ, जहाँ अन्तिम प्रमाणीकरण गरिनेछ।
हाल एमालेसँग करिब साढे छ लाख सदस्य रहेका छन्। अघिल्लो महाधिवेशनको तुलनामा सदस्य संख्या २८ प्रतिशतले बढेकाले यसपटक प्रतिनिधिको संख्या पनि करिब ३ हजार पुग्ने अनुमान गरिएको छ।
यसअघि चार वर्षअघि चितवनमा सम्पन्न दशौँ महाधिवेशनमा २,१५३ प्रतिनिधि सहभागी भएका थिए। सो महाधिवेशनले केपी शर्मा ओलीलाई दोस्रोपटक अध्यक्षका रूपमा चयन गरेको थियो।
