काठमाडौं । सामाजिक सञ्जाल टिकटकमार्फत चिनिएकी आँचल नाथको रहस्यमय मृत्यु प्रकरण नयाँ मोडमा पुगेको छ। जिल्ला अदालत काठमाडौँमा पाँच जनाविरुद्ध आत्महत्या दुरुत्साहन मुद्दा दायर गरिएको छ। जिल्ला प्रहरी परिसर, काठमाडौँले विस्तृत अनुसन्धानपछि मुद्दा दायर गरेको हो।
प्रहरीका अनुसार नरेफाँटका २६ वर्षीय सञ्जु विक, उर्मिला विक (अनु), सरस्वती भण्डारी (सरु), २२ वर्षीय राजेश बुढा र लक्ष्मी बुढालाई प्रतिवादी बनाइएको छ। तीमध्ये सञ्जु विक मात्र पक्राउ परेका छन् भने बाँकी चार जना फरार छन्।
आँचल नाथ टिकटकमा लोकप्रिय सामग्री निर्माणसँगै मोडलिङमा पनि सक्रिय थिइन्। दुई वर्षअघि जापानी भाषा अध्ययनका लागि गाउँबाट काठमाडौँ आएकी उनी भक्तपुरमा डेरा गरी बस्दै आएकी थिइन्।
आँचलका भिनाजु प्रकाशनाथ योगीले दिएको जाहेरीअनुसार टिकटकमार्फत सञ्जु विकसँग चिनजान भएकी आँचलको सरस्वती भण्डारीसँग विवाद चलिरहेको थियो। जाहेरीमा भनिएको छ, “सञ्जु विककी श्रीमती उर्मिलाले पनि विवादमा प्रोत्साहन दिने गरेकी थिइन्।” यही विवादका कारण असोज ९ गते सञ्जुको ग्यारेजमा भएको छलफलका क्रममा उनीहरूले आँचलमाथि गालीगलौज र धम्की दिएको उल्लेख छ।
त्यसपछि आँचलले पेट्रोल छर्की आफैंलाई आगो लगाएको प्रहरी अनुसन्धानबाट खुलेको छ। गम्भीर रूपमा घाइते भएकी उनलाई सञ्जुले सिनामङ्गलस्थित काठमाडौँ मेडिकल कलेज पुर्याएका थिए, जहाँ उपचारकै क्रममा चिकित्सकहरूले उनलाई मृत घोषणा गरेका थिए।
सञ्जुले भने प्रहरीलाई दिएको बयानमा आफूहरूले धम्की नदिएको दाबी गर्दै भनेका छन्, “आगो बलिरहेको देखेपछि मैले ज्याकेट र पानी प्रयोग गरेर निभाउने प्रयास गरेँ र उनलाई ब्ल्याङ्केटले बेरी अस्पताल पुर्याएँ।”
मुलुकी अपराध संहिता, २०७४ को दफा १८५ अनुसार, कसैलाई आत्महत्या गर्न उक्साउने वा त्यस्तो परिस्थिति सिर्जना गर्ने व्यक्तिलाई पाँच वर्षसम्म कैद र ५० हजार रुपैयाँसम्म जरिवानाको सजाय हुने प्रावधान छ।
