काठमाडौं । बाराको प्रसौनी गाउँपालिका–६ का वडाध्यक्ष बृजकिशोर कुशवाहाले एक शिक्षकलाई बन्धक बनाएर कुटपिट गरेको घटना सार्वजनिक भएको छ। पर्सा बहुदरमाईका स्थायी बासिन्दा तथा हाल प्रसौनी–६ बेलहियामा बस्दै आएका स्मार्ट कोचिङका शिक्षक नागेश्वर यादवलाई गत २८ साउनमा वडाध्यक्षको समूहले वडा कार्यालयमै अर्धनग्न बनाई बाँधेर कुटपिट गरेको भिडियो बाहिरिएको हो।
पीडित यादवका अनुसार, आफूलाई “वडाध्यक्षले बोलाएका छन्” भन्दै केही व्यक्तिहरूले समातेपछि वडा कार्यालयमा लगिएको थियो। त्यहाँ पुगेपछि वडाध्यक्ष कुशवाहाले नलकटुवा देखाउँदै धम्की दिँदै हातखुट्टा बाँधेर कुटपिट गरेको उनले बताए।
“मलाई अर्धनग्न बनाएर ८ जना बसेर रक्सी खाँदै कुटपिट गरे। सादा कागजमा जबर्जस्ती औंठाछाप र हस्ताक्षर गराए, मारेर फाल्छु भन्ने धम्की पनि दिए,” शिक्षक यादवले प्रहरीसमक्ष दिएको जाहेरीमा उल्लेख छ।
घटनापछि उनले जिल्ला प्रहरी कार्यालय बारामा उजुरी दर्ता गरे। सोही आधारमा प्रहरीले वडाध्यक्ष कुशवाहालाई पक्राउ गरी शरीर बन्धक तथा कुटपिट मुद्दामा अनुसन्धान सुरु गरेको जनाएको छ।
प्रसौनी गाउँपालिका अध्यक्ष विनोदप्रसाद जयसवालका अनुसार, उजुरी दर्ता भएसँगै वडाध्यक्ष पक्राउ परेका हुन्।यसैबीच, वडाध्यक्ष कुशवाहा नेकपा माओवादी केन्द्रबाट निर्वाचित भएका हुन्। घटना सार्वजनिक भएपछि माओवादीले उनलाई तत्काल ६ महिनाका लागि पार्टीबाट निलम्बन गरेको जनाएको छ।
