नेपाली काँग्रेसका सांसद चन्द्र भण्डारीले विद्यालयको पाठ्यक्रममा प्रविधिको प्रयोगलाई अनिवार्य रूपमा समेटिनुपर्ने बताएका छन् । बिहीबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा बोल्दै उनले यस्तो माग गरेका हुन् ।
विद्यालय शिक्षा विधेयक, २०८० सम्बन्धी समितिको प्रतिवेदनमाथिको छलफलमा भाग लिँदै सांसद भण्डारीले विश्वव्यापीकरणसँगै विकास भएको नवीन प्रविधिलाई पाठ्यक्रममा अविलम्ब समावेश गर्नुपर्ने आवश्यकता औंल्याए । ‘हामीले पाठ्यक्रममा अहिले जसरी भए पनि नयाँ प्रविधिको विकास भएको कुरा महसुस गर्नुपर्छ,’ उनले भने, ‘हाम्रो पाठ्यक्रममा विश्वव्यापीकरणको प्रविधिको कुरा अवलम्बन गर्ने कुरा राख्नुपर्छ ।’
उनले शिक्षक सरुवाको प्रावधानलाई थप स्पष्ट पार्न पनि माग गरे । शिक्षकहरूले सरुवाको दफामा आपत्ति जनाएको उल्लेख गर्दै उनले खाली रहेको ठाउँमा प्रदेश, जिल्ला वा गाउँमा एक पटक सरुवा हुन पाउने अवसर स्पष्ट रूपमा उल्लेख गरिनुपर्ने बताए । ‘शिक्षकहरूले अहिले सरुवाको दफामा हामीलाई प्रदेश, जिल्ला, गाउँमा एक पटक अवसर दिइयोस् । हामी खाली भएको ठाउँमा जान पाइयोस् भनेका छन्,’ उनले भने, ‘यस्तो कुरा बुझिने गरी राखौँ ।’
यसका साथै, सांसद भण्डारीले प्राध्यापकहरूलाई दलीय राजनीतिबाट टाढा राख्नुपर्नेमा पनि जोड दिए । प्राध्यापकहरूलाई आफ्नो पेशागत संघसंस्थामा आबद्ध हुन नदिने र विद्यालयमै केन्द्रित हुने व्यवस्था गरिएसँगै उनीहरूलाई कुनै पनि नयाँ संगठन खोल्न पनि दिन नहुने कुरा विधेयकमा लेखिनुपर्ने उनको भनाइ थियो । ‘प्राध्यापकहरुलाई राजनीति नगर्ने, आफ्नो पेशागत संघसंस्थामा आवद्ध हुन नपाउने, विद्यालयमै केन्द्रित हुने भनिएको छ, प्राध्यापकहरुले अर्को संगठन पनि खोल्न नपाउने लेख्नुपर्छ,’ उनले भने ।
