म्याग्दी। म्याग्दीको बेनी नगरपालिका–५ गाजने गाउँमा परीक्षणका रूपमा गरिएको स्याउखेतीले उत्पादन दिन थालेपछि स्थानीय कृषक उत्साहित भएका छन् ।
समुद्री सतहदेखि करिब दुई हजार ५० मिटर उचाइमा रहेको गाजनेमा चार वर्षअघि रोपिएका १०० स्याउका बोटमध्ये अधिकांशमा फल लाग्न थालेको छ । गाउँका २४ घरधुरीमध्ये धेरैले पाँचदेखि १५ बोटसम्म रोपेका थिए । मुस्ताङबाट ल्याइएका गोल्डेन र रेड डेलिसियस प्रजातिका बिरुवाले उत्पादन दिन थालेको स्थानीय नीलकण्ठ शर्माले जानकारी दिए।
शर्माका अनुसार परीक्षण सफल भएपछि अब गाउँभर स्याउखेतीलाई व्यावसायिक रूपमा विस्तार गर्ने तयारी छ । यस्तै, कृषक गङ्गादत्त पौडेलले पाँच वटा बोट रोपेका मध्ये उत्पादन सुरु भइसकेको र यस वर्ष तीन रोपनी जमिनमा स्याउखेती विस्तार गर्ने योजना रहेको बताए ।
गाउँमा काम गर्ने जनशक्ति अभावले खेतीयोग्य जमिन बाँझिने समस्या बढिरहेको अवस्थामा नगदेबालीका रूपमा स्याउखेती विस्तार गर्ने सोच बनाइएको छ । यसअघि विसं २०४२ मा पनि सामूहिक रूपमा गरिएको स्याउखेती मलजल र स्याहारको अभावले निरन्तरता पाउन सकेको थिएन ।
चिसो हावापानी भएकाले यस क्षेत्रमा स्याउखेतीको राम्रो सम्भावना रहेको कृषि प्राविधिकहरू बताउँछन् । म्याग्दीमा यसअघि गुर्जा र राम्चेमा पनि परीक्षणका रूपमा स्याउखेती गरिएको छ ।
