दोलखा ।दोलखाको विगु गाउँपालिका–१ हुरहुरेमा ढुङ्गासहितको पहिरो खस्दा एक जनाको मृत्यु भएको छ भने दुई जना घाइते भएका छन्। सानीमा हाइड्रोपावर कम्पनीको सडक सर्वेक्षणको क्रममा बुधबार दिउँसो २:३० बजे पहिरो खसेको हो।
जिल्ला प्रहरी कार्यालय दोलखाका प्रमुख प्रहरी नायव उपरीक्षक ज्ञानकुमार महतोका अनुसार पहिरोमा परेर गम्भीर घाइते भएका नुवाकोट, विदुर नगरपालिका–४ का २९ वर्षीय सब–इन्जिनियर सुनिल न्यौपानेको काठमाडौँ ल्याएर उपचार गरिने क्रममा मृत्यु भएको हो।
घटनामा रामेछापको लिखुतामाकोशी गाउँपालिका–४ का २९ वर्षीय विशाल बुढाथोकी र सिन्धुपाल्चोकको मेलम्ची नगरपालिका–१ का २७ वर्षीय सन्दीप चौलागाईं पनि घाइते भएका छन्। उनीहरूको अवस्था सामान्य रहेको प्रहरीले जनाएको छ।
घटनापछि इलाका प्रहरी कार्यालय लामाबगरबाट गएको टोलीले तीनै जनाको उद्धार गरेको थियो। गम्भीर घाइते न्यौपानेलाई हेलिकप्टरमार्फत काठमाडौँ लगिएको थियो।
