काठमाडौँ, ५ असारः राष्ट्रिय समाचार समिति (रासस)ले गणतन्त्र दिवस–२०८२ का अवसरमा आयोजना गरेको तस्बिर प्रदर्शनी यही असार १६ गतेसम्म जारी रहनेभएको छ ।
रासस सञ्चालक समितिको आजको बैठकले यही असार ७ गतेसम्म निर्धारित तस्बिर प्रदर्शनी आगन्तुक अवलोकनकर्ताको बढ्दो चाहना र रुचिअनुसार असार १६ गतेसम्म लम्ब्याउने निर्णय गरेको हो ।
राससका कार्यकारी अध्यक्ष धर्मेन्द्र झाले तस्बिर प्रदर्शनीप्रति आगन्तुक अवलोकनकर्ताको बढेको चाहना र रुचिअनुसार तस्बिर प्रदर्शनी लम्ब्याइएको जानकारी दिनुभयो । साथै उहाँले ग्राहकको मागलाई दृष्टिगत गरी राससले आफ्ना उत्पादनमा विविधता थपिरहेको सन्दर्भमा प्रदर्शनीले राससका समाचार र तस्बिरलाई अझ समृद्ध बनाउन सहयोग पुगेको विश्वास व्यक्त गर्नुभयो ।
राससले गत वर्ष भौतिक पूर्वाधार निर्माण र त्यसअघि मुलुकको सांस्कृतिक विविधतासम्बन्धी प्रदर्शनी गरेको थियो । भद्रकाली प्लाजास्थित रासस केन्द्रीय कार्यालयमा आयोजना गरिएको ‘पर्वतीय पर्यटन ः हाम्रो शान हाम्र्रो पहिचान’ विषयक प्रदर्शनीमा हिन्दूकुश हिमशृङ्खलका हिमाल, हिमाली र पहाडी जनजीवन तथा देशका प्रमुख पर्यटकीयस्थलका ९६ वटा तस्बिर समेटिएका छन् ।
जलवायु परिवर्तनका कारण नेपालजस्ता पर्वतीय मुलुकले व्यहोर्नुपरेका समस्याप्रति अन्तरराष्ट्रिय समुदायको ध्यानाकर्षण गराउने उद्देश्यले नेपाल सरकारद्वारा हालै सम्पन्न ‘सगरमाथा संवाद’ कार्यक्रमलाई जोडेर रासस समाचारदाता र फोटो पत्रकारले विभिन्न कालखण्डमा खिचेका हिमाल, पर्वत तथा पर्यटकीयस्थलसम्बन्धी तस्बिर प्रदर्शनीमा समावेश छन् ।
प्रदर्शनीमा हालसम्म उपप्रधानमन्त्री, मन्त्री, सांसद, नेपाल सरकारका सचिव, प्रधानसेनापति, विभिन्न दलका नेताहरु, राजदूतहरु, विद्यार्थीलगायतले तस्बिर प्रदर्शनीको अवलोकन गरिसक्नुभएको छ । जलवायु परिवर्तनबाट मानव सभ्यतामा आएको चुनौती, हिमाल र हिमाली जनजीवनमा परेको प्रभावबारे अन्तरराष्ट्रिय सञ्चारमाध्यमले प्राथमिकताका साथ आवाज उठाइरहेका अवस्थामा हिमालको संरक्षणका लागि बहस र पैरवी गर्न प्रदर्शनीबाट योगदान पुग्नेमा रासस विश्वस्त छ ।
नेपालको पूर्वदेखि पश्चिमसम्म फैलिएका हिमशृङ्खलाको प्रवर्द्धनबाट आर्थिक आयआर्जनमा योगदान पुग्ने अपेक्षा गरिएको छ । विश्वका आठ हजार मिटरभन्दा अग्ला १४ हिमशिखरमध्ये सगरमाथा, कञ्चनजङ्गा, ल्होत्से, मकालु, चोयु, मनास्लु, अन्नपूर्ण र धवलागिरि हिमशृङ्खला नेपालमा छन् ।
