वालिङ (स्याङ्जा) : सरकारका मुख्यसचिव एकनारायण अर्यालले विकासमा राजनीति गरे पछि परिने भएकाले त्यसो गर्न नहुने बताउनुभएको छ ।
स्याङ्जाको वालिङ र गल्याङ नगरपालिकाको सङ्गमस्थलमा अवस्थित गह«ौँसुर मन्दिर परिसरमा नवनिर्मित अतिथि गृहको आज उद्घाटन गर्दै मुख्यसचिव अर्यालले विकासलाई राजनीतिभन्दा माथि राखेर कार्य गर्नुपर्नेमा जोड दिनुभयो ।
“विकास सबैको साझा हुनुपर्छ र त्यो राजनीतिभन्दा माथि राखेर अगाडि बढ्नु जरुरी छ । विकासका लागि सबैसँग सहकार्य गरी एकजुट भएर अगाडि बढ्नु जरुरी छ”, उहाँले भन्नुभयो, “सबैको अपनत्व र सहकार्य भएमा विकासले गति लिन्छ, प्रभावकारी हुन्छ । राजनीति गर्न थालियो भने पूर्वाधार निर्माण पूरा नहुन सक्छन्, जसकाकारण विकास निर्माण पछाडि धकेलिन पुग्छ ।”
एकअर्काप्रति आग्रह पूर्वाग्रहभन्दा पनि सबै मिलेर सहकार्य र समन्वयका आधारमा काम गर्नुपर्ने मुख्यसचिव अर्यालको भनाइ थियो । विकास निर्माणमा राजनीतिक खिचातानी हुनु दुःखद पक्ष भएको उल्लेख गर्दै उहाँले राजनीतिबाट माथि उठेर विकास निर्माणमा सहभागी हुन सबैलाई आग्रह गर्नुभयो ।
सहरी विकास मन्त्रालयको सहयोगमा दर्शनार्थी, विशिष्ट व्यक्ति, उच्च ओहोदाका व्यक्तिलाई आवासीय सुविधासहित सेवा दिनेगरी अतिथि गृह निर्माण गरिएको हो । मुख्यसचिव अर्यालले आजै पुतलीबजार नगरपालिकामा अवस्थित प्रसिद्ध धार्मिक तीर्थस्थल सतौँं चण्डीमा पूजाअर्चना गर्नुभयो । उहाँले आजै पुतलीबजार–१ मा नवनिर्मित राष्ट्रिय अनुसन्धान केन्द्र स्याङ्जाको भवन उद्घाटन गर्नुभयो ।
