काठमाडौं– भारतले गरेको हवाइ आक्रमणमा कम्तीमा एउटा रफायल लडाकु विमान पाकिस्तानले खसालेको फ्रान्सेली गुप्तचर स्रोतले पुष्टि गरेको छ । एक जना नेपालीसहित २६ जनाको ज्यान जानेगरी भारत प्रशासित जम्मु कश्मीरमा भएको आतंककारी आक्रमणको बदला लिन भारतले पाकिस्तानमा ‘अपरेसन सिन्दुर’ नामक सैन्य कारवाही गरेको हो ।
भारतीय कारवाहीको जवाफस्वरुप पाकिस्तानले भारतका ५ वटा लडाकु विमान खसालेको दाबी गर्दै आएको छ । पाकिस्तानले फ्रान्समा निर्मित डासट रफायल तीन वटा र सोभियत संघमा निर्मित मिकोयान मिग २९ र सोभियत संघमै निर्मित सुखाइ सु ३० लडाकु विमान खसालेको दाबी गरेको छ । यसबारे भारतीय पक्षले कुनै टिप्पणी गरिसकेको छैन ।
यद्यपि फ्रान्सेली गुप्तचर सेवाको उच्च स्रोतले अमेरिकी टेलिभिजन सीएनएनलाई पाकिस्तानले कम्तीमा एउटा रफायल लडाकु विमान खसालेको जानकारी दिएको छ । त्यसबाहेक पाकिस्तानले अरु पनि रफायल खसालेको हुनसक्ने विषयमा जानकारी लिने प्रयास भइरहेको उक्त स्रोतलाई उद्धृत गर्दै सीएनएनले जनाएको छ ।
रफायल लडाकु विमान निर्माण गर्ने फ्रान्सेली कम्पनी डासट एभिएसन र फ्रान्सेली सेनाले पाकिस्तानी दाबीबारे कुनै प्रतिक्रिया दिएको छैन ।
यसमा हवाइ युद्ध र आकाशबाट जमिनमा मार हान्न मिल्ने ३० मिलिमिटरको तोप जडान गरिएको हुन्छ । त्यसबाहेक यसमा आकाशबाट आकाशमा मार हान्ने क्षेप्यास्त्र, लेजर गाइडेड बम र क्रुज क्षेप्यास्त्र पनि जडान गरिएको हुन्छ ।
यसअघि भारतले फ्रान्ससँग २६ वटा रफायल खरिद गरेको छ ।
