पूर्व राजा ज्ञानेन्द्र शाहको स्वागत र्यालीमा योगी आदित्यनाथको तस्बिरसहितको ब्यानर मुख्य आयोजकहरुको अनुमति र छलफलबीना आफुखुसी राखिएको खुलेको छ ।
पूर्व राजा ज्ञानेन्द्र शाह आइतबार पोखराबाट एकमहिना लामो बसाईपछि काठमाडौं फर्किएका छन् । उनको आगमनका लागि भब्य स्वागतको आयोजनामा देखिनेगरि कमल थापा र राजेन्द्र लिङदेको राप्रपा तथा दुर्गा प्रसाईको अभियान थिए । यस्तै स्वस्र्फूतरुपमा नागरिकहरु सहभागि हुनका लागि विभिन्न ब्यक्तिहरुबाट ब्यक्तिगत रुपमा आह्वान भएको थियो ।
यही र्यालीमा अन्य ब्यानरसँगै प्रदिपविक्रम राणाको प्रायोजनमा योगी आदित्यनाथको तस्बिर समेत प्रयोग भएको छ । त्यसो त गुरु गोरखनाथलाई शाह बंशका चेला मानिन्छ ।योगी आदित्य नाथ पनि गोरख नाथका चेला भएकाले ब्यानरमा उनको तस्बिर प्रयोग भएको दाबी केही सहभागिहरुले गरेका छन् ।
योगी आदित्यनाथको तस्बिरसहितको ब्यानरमा नामै राखेर प्रायोजन गर्ने प्रदिप विक्रम राणा राप्रपाका पुराना नेतामध्य एक हुन् ।
२०७३ सालको महाधिवेशनमा कमल थापासँग अध्यक्ष पदमा उम्मेदवार बनेर पराजित भएका राणा हाल आफूहरुसँग भने नरहेको राप्रपा प्रवक्ता मोहनकुमार श्रेष्ठले बताएका छन् ।
आफूलाई हिन्दूवादी भनेर चिनाउने राणा अहिले राप्रपा र राप्रपा नेपाल दुवै पार्टीमा नरहेको दावी ती पार्टीका नेताले गरेका छन् । राजावादीका फरक फरक झुण्ड भएकाले आजको प्रदर्शनमा भएका गलत हर्कतको जिम्मा लिने कोही नभएको नेताहरुले बताएका छन् ।
यसैबीच राप्रपा नेपालका महामन्त्री राजाराम बर्तौलाले पनि प्रदिप विक्रम राणा अहिले आफ्नो पार्टीमा नरहेको बताए । उनले २०७३ सालको महाधिवेशनमा अध्यक्षमा पराजित भएदेखि नै उनी कमल थापासँग नरहेको दाबी गरे ।
