काठमाडौं । अमेरिकाले निष्कासन गरेका ८ जना नेपाली काठमाडौं आइपुगेका छन्।
नेपाल फिर्ता हुने नेपालीहरूमा सुष्मा घर्ती, लक्ष्मण कलेल, सुकुमार पुन मगर, हिमाल विक, मोहन गौतम, टोपबहादुर घर्ती, कमलप्रकाश ओली र तीर्थबहादुर थापा रहेका छन्।
उनीहरू जीआरपी-२३ चार्टर विमानमार्फत आज बिहान त्रिभुवन अन्तर्राष्ट्रिय विमानस्थलमा अवतरण गरेका हुन्।
अवैध आप्रवासी फिर्ता नीति अनुसार निष्कासन
आठ नेपालीमध्ये केही गैरकानूनी रूपमा अमेरिका बस्दै आएका थिए भने केही अमेरिकी अध्यागमन कानून उल्लंघन गरेका कारण निष्कासनमा परेका हुन्। अमेरिकी राष्ट्रपति डोनाल्ड ट्रम्पको अवैध आप्रवासी फिर्ता पठाउने नीतिअनुसार उनीहरूलाई नेपाल फर्काइएको हो। भारत लगायत अन्य देशका अवैधानिक आप्रवासीहरूलाई समेत उनीहरूको देश फर्काइरहेको छ।
प्रहरीको जिम्मा लगाइयो
त्रिभुवन अन्तर्राष्ट्रिय विमानस्थल अध्यागमन कार्यालयले निष्कासनमा परेका नेपालीलाई प्रहरीको जिम्मा लगाएको छ। उनीहरूलाई चार्टर्ड विमानमै ल्याइ बुधबार बिहान नेपाल छाडिएको थियो।
विमानस्थलस्थित अध्यागमन कार्यालयका प्रमुख तीर्थराज भट्टराईका अनुसार ८ जनालाई प्रहरीको जिम्मा लगाइएको छ। उनीहरू मानव तस्करीमार्फत अमेरिका पुगेका हुनसक्ने आशंकामा प्रहरीको मानव बेचबिखन अनुसन्धान ब्यूरोले उनीहरूसँग सोधपुछ गरिरहेको छ। अनुसन्धानपछि उनीहरूलाई परिवारको जिम्मा लगाउने तयारी गरिएको छ।
अवैध रूपले अमेरिका पठाउने गिरोहबारे अनुसन्धान
ब्यूरोका प्रवक्ता एसपी नरेन्द्र कुँवरका अनुसार उनीहरूसँग अमेरिका जाने प्रक्रिया, ठगी वा जबरजस्ती गरिएकाे थियो कि होइन भन्ने विषयमा अनुसन्धान भइरहेको छ। कुँवरले भने, ‘उहाँहरू अहिले हाम्रो कार्यालयमा हुनुहुन्छ। अब हामी उनीहरू अमेरिका कसरी पुगे, कसैले ठगी गरेर वा जबरजस्ती पठाएको हो कि भन्नेबारे सोधपुछ गर्छौँ र परिवारको जिम्मा लगाउँछौँ।’
प्रहरीले उनीहरूलाई कारबाही गर्ने उद्देश्य नरहेको स्पष्ट पारेको छ। बरु, उनीहरू अवैध रूपमा अमेरिका पठाउने गिरोहको पहिचानका लागि अनुसन्धान भइरहेको छ।
डोनाल्ड ट्रम्प राष्ट्रपति बनेपछि यसअघि नै २७ जना नेपालीलाई अमेरिका निष्कासन गरी नेपाल फर्काइएको थियो। अमेरिकी कानुनअनुसार निष्कासन गरिएका नेपालीहरूमाथि अमेरिका स्वयंले कारबाही र जरिवाना गर्ने भएकाले नेपालमा भने कुनै कानुनी कारबाही हुने छैन।
