काठमाडौं । चुनावमा अन्तर्घात गर्नेलाई के गर्ने भन्नेमा नेपाली कांग्रेसमा नैतिक प्रश्न उठेको छ ।
पुस २८ गते बस्ने केन्द्रीय कार्यसमिति बैठकमा गत प्रतिनिधिसभा र प्रदेशसभा चुनावमा अन्तर्घात गर्नेका विषयमा छलफल हुने भएको हो । तत्कालीन पाँचदलीय गठबन्धन नै भत्किसकेको अवस्थामा निर्वाचनमा विद्रोह गर्नेलाई के गर्ने भन्नेमा पार्टी नेतृत्वसामु नैतिक प्रश्न उठेको छ ।
महामन्त्री गगन थापाले केन्द्रीय समिति बैठकमा नैतिक र सैद्धान्तिक रुपमा यही विषयमा छलफल हुने बताए । निर्वाचनमा अन्तर्घात गरेको भन्दै पार्टी मुख्यालयमा ३५ सयभन्दा बढी उजुरी परेका छन् । कतिपय उजुरी प्रमाणसहितका परेको अनुशासन समितिका संयोजक आनन्दप्रसाद ढुंगानाले बताए । उजुरी गर्ने समय माघ १५ गतेसम्म रहेकाले अझै बढ्न सक्ने देखिएको छ ।
त्यसो त तत्कालीन पाँचदलीय गठबन्धनप्रति असन्तुष्ट भएर चितवन १ बाट प्रतिनिधिसभा निर्वाचनमा उम्मेदवार बनेका केन्द्रीय सदस्य दिनेश कोइरालालाई पार्टीले कारबाही गरिसकेको छ । त्यस्तै पर्साका पूर्वजिल्ला सभापति अजय द्विवेदी, सर्लाहीका अमरेशकुमार सिंहलगायत पनि कारबाहीमा परिसकेका छन् ।
यता कांग्रेस अनुशासन समितिले पूर्णता भने पाएको छैन । केन्द्रीय सदस्य आनन्दप्रसाद ढुंगाना संयोजक तोकिए पनि अरु पाँच सदस्यको टुंगो लागेको छैन ।
