काठमाडौं ।पोखराको सूर्यदशन सहकारी ठगी प्रकरणमा जिल्ला अदालत कास्कीको आदेशमा ६५ लाख धरौटी रकम बुझाएर रिहा भएका गोर्खा मिडियाका प्रबन्ध निर्देशक पूर्व गृहमन्त्री तथा रास्वपा सभापतिमाथि काठमाडौंको स्वर्णलक्ष्मी सहकारी ठगी प्रकरणमा बुधबार तेस्रो दिन पनि जिल्ला अदालत काठमार्डौमा थुनछेक बहस जारी छ । लामिछानेलाई थुनछेक बहसका लागि बुधबार अदालतमा हाजिर गराइएको छ ।
काठमाडौंको स्वर्णलक्ष्मी सहकारी ठगीमा लामिछानेविरुद्ध पनि मुद्दा दर्ता भएपछि बयानका लागि लामिछानेलाई आइतबार काठमाडौं जिल्ला अदालत हाजिर भएका थिए । आइतबार थुनछेक बहस नसकिएपछि न्यायाधीश माधवप्रसाद अधिकारीले प्रहरीको न्यायिक हिरासत पठाउने आदेश दिएका थिए । लामिछाने आइतबार र सोमबार काठमाडौं प्रहरीको न्यायिक हिरासतमा बसेका थिए । सोमबार दोस्रो दिन पनि लामिछानेविरुद्ध नौँ जना सरकारी वकिलहरुले थुनछेक बहस गरेका थिए। सोमबारको थुनछेक बहसमा सरकारी वकिलहरुले पुर्पक्षका लागि थुनामा पठाउन माग गरेका थिए । सरकारी वकिलहरुले सो दिन लामिछानेलाई पुर्पक्षका लागि थुनामा नपठाए प्रमाणहरु नस्ट हुने बताएका थिए ।
न्यायाधीश अधिकारीले आइतबारको आदेशलाई बुधबारबाट जारी राखेको छ । पूर्वगृहमन्त्री लामिछानेलाई भद्रकालीस्थित काठमाडौं प्रहरी परिसरको हिरासतमा राखिएको थियो ।
