वाशिङ्टन – मिलेनियम च्यालेन्ज कर्पोरेसन (एमसीसी) को सञ्चालक समितिले नेपाल कम्प्याक्टका लागि थप ५ करोड अमेरिकी डलर सहयोग स्वीकृत गरेको छ। यो निर्णयसँगै नेपाल कम्प्याक्टको कुल बजेट ७४ करोड ७ लाख अमेरिकी डलरसम्म पुगेको छ।
सञ्चालक समितिको यस निर्णयले नेपाल सरकार र एमसीसीबीचको साझा प्रतिबद्धतालाई अझ सुदृढ बनाएको छ। यो सहयोगले नेपालका विकास प्राथमिकताहरूलाई रूपान्तरणकारी तथा गुणस्तरीय पूर्वाधार परियोजनाहरूको माध्यमबाट अघि बढाउने उद्देश्य राखेको छ।
एमसीसी कम्प्याक्ट अपरेशनका उपाध्यक्ष क्यामरन अल्फोर्डले भने, “यस अतिरिक्त आर्थिक सहयोगले नेपालको विद्युत् ग्रिडलाई बलियो बनाउने र दीर्घकालीन आर्थिक वृद्धिलाई प्रवर्द्धन गर्ने दिशामा कम्प्याक्टको सफलता सुनिश्चित गर्ने हाम्रो साझा प्रतिबद्धतालाई पुष्टि गर्दछ।”
सन् २००४ मा स्थापना भएको मिलेनियम च्यालेन्ज कर्पोरेसन अमेरिकी सरकारको स्वतन्त्र विकास निकाय हो। यसले सुशासन, भ्रष्टाचारविरुद्धको लडाइँ, र लोकतान्त्रिक अधिकारको सम्मानमा कडा मापदण्ड पूरा गर्ने देशहरूलाई पूर्वाधार निर्माण, सुधार, र नीतिगत संस्थागत सुधारका लागि समयसीमामा बाँधिएका अनुदान उपलब्ध गराउँदै आएको छ।
नेपालमा यो सहयोगले विद्युत् ग्रिड सुधार, पूर्वाधार विस्तार, र दीर्घकालीन आर्थिक वृद्धिमा महत्त्वपूर्ण योगदान पुर्याउने विश्वास गरिएको छ।
